Wahi a kekahi ʻōlelo noʻeau, “E ʻai i ka mea i loaʻa.” Akā, e akahele i nā hale ʻaina e ʻohi ai a lawa ka makemake. Nui nā hale ʻaina maikaʻi i Honolulu nei no ka ʻai ʻana ā pōhalakē. E hele ā ʻono ka puʻu i kēia mau mea ʻai.
I kekahi aumoe, lohe ʻoe i ka nakulu ʻana o kou ʻōpū. Pōloli nō ʻoe. Akā, paʻa ka puka o nā hale ʻaina a pau loa i kēia manawa! Mai hopohopo, e hele i Sikdorak. Hāmama ka puka o kēia hale ʻaina Kōlea a hiki i ka hola ʻelua o ka pilipuka. Aia kēia wahi ma ke ala nui ʻo Keʻeaumoku i kahi kokoke i ka hale kūʻai ʻo Walmart. Nāu nō ʻoe e pūlehu iho i nā ʻiʻo like ʻole ma ka hao manamana i waena o ke pākaukau. Hiki ke koho i ka pipi, ka moa, ka ʻōpū puaʻa, a i ʻole ke elelo o ka pipi. Lawelawe ʻia nā pūpū Kōlea ma ka ʻaoʻao e laʻa ke kimchi, ka lau ʻai, a pēlā aku nō. ʻO kaʻu mea punahele o kēia hale ʻaina, aʻe ʻia ka lawe ʻana mai i kāu mau ʻalekohola i ʻono ai. No laila, e lawe mai i kou pōloli a me kāu mau pahu hau liʻiliʻi me ka pia a ʻai ā māʻona ma Sikdorak.
ʻIʻini koʻu naʻau i ka ʻai kupa i koʻu mau lā maʻi. Inā paʻapū kou ihu, e hele i ka hale ʻaina ʻo Little Sheep no ka ʻai ʻana i nā ʻai e hoʻōla ana i kou kino. Nāu nō e kuke i nā ʻāpana lahilahi o nā ʻiʻo like ʻole i kekahi kupa me nā lau ʻai.
Paila ʻia nā mea ʻai a pau i kēia kupa ā mākaukau no ka ʻai ʻana. ʻO kaʻu mea punahele ka hoʻolako ʻana i nā kai like ʻole. Hiki ke hoʻohui i kāu kai ponoʻī no ke kūpenu ʻana i nā mea ʻai e kuke ai. E ʻai me ka laiki a lawa pono. Leʻaleʻa kēia ʻano ʻai a he ʻono ʻiʻo nō.
Ke make ʻai ʻoe a makemake ʻoe i ka iʻa maka, a laila, e hele i Kats Sushi ma ka huina o ke ala nui ʻo King a me Alapaʻi. Liʻiliʻi a pili koke kēia hale ʻaina. No laila, e kelepona ʻoe ma mua o kou hele ʻana aku a e hoʻopaʻa i pākaukau nou. Hoʻokahi wale nō loea iʻa e hoʻomākaukau ana i ka nigiri a me ka handrolls. ʻOno nō ka iʻa momona e laʻa ka sake, ka ʻahi, a me ka hamachi. Makemake au e kūpena i ka iʻa i ke koiū a me ka wasabi. Lawelawe ʻia ke kī wela no ka inu ʻana, akā, inā makemake ʻoe i ka pia, ʻae ʻia ka lawe ʻana aku i kāu mau mea inu ponoʻī.
Eia kaʻu kāhea ʻai. Pau ka puni ʻai. Pau ka ʻōpū hao. Pau ke kualana o ka ʻōpū. E hele i ia mau hale ʻaina a ʻai ā māʻona. E ʻai ā hewa ka waha. E komo mai ka pōhalakē. ʻAkahi nō a ola ka pōloli!
© Puʻuwai Kane 2019
