Eia aʻe kaʻu kiʻi o ke paʻi ʻana. He kiʻi nō ia no kuʻu wahi hoa aloha ʻo Shalia Kamakaokalani, ka Miki Aloha Hula o ka Mele Manaka i hala aku nei, ke hula nei ma ka ʻaoʻao o kekahi hui mele kaulana, me Nā Hoa hoʻi. ʻOiai ʻaʻole i pili loa kēia māhele o ka ʻaha ʻōlelo i ka hana o waho aku o ka hale, ua ʻume ʻia mai au e ke mele e kani mai ana e komo aku. No laila, ua noho a nanea au i ka hula me ke mele. ʻO ka mea naʻe i pā iho ai kuʻu naʻau, ʻo ia nō ka ʻike ʻana aku o kuʻu mau maka i ke kūʻēʻē
i ʻike ʻole ʻia paha e ka hapanui o ka poʻe ma laila. ʻO kēia kūʻēʻē aʻu e ʻōlelo aku nei, pili nō ia i ka noho hewa mau ʻana o ʻAmelika Hui Pū ʻIa ma luna o kēia ʻāina kūʻokoʻa o ka Hawaiʻi. Ua hele kuʻu naʻau a ʻeha maila i ka ʻike ʻana aku i ka hae ʻAmelika i hope o kuʻu wahi hoa e hula mai ana i mea e hoʻohanohano ai i kekahi o ko kākou poʻe aliʻi wahine, ʻo ia nō hoʻi ʻo ka mōʻīwahine Kapiʻolani. Ua ʻeha maila no ka mea, no ka poʻe ʻaha ʻōlelo o laila, he wahi hula wale nō ia. ʻAʻohe nō he mea koʻikoʻi. A ma muli o ia minamina e holomua mau aku nei au i loko o kēia ala hoʻonaʻauao.
© Kaimana Kawaha 2019
01/25/19
