Monate Monate Taro Huʻahuʻa no Vaiavai





Kuʻulei Kapule





I ke kipa ʻana o nā malihini i Vaiavai, e lohe ʻia ka ʻōlelo "Monate monate taro hu’ahu’a no Vaiavai." He ʻōlelo haʻaheo kēia na ka mahiʻai o Avera. He ʻōlelo ia no ka momona o ke kalo e hoʻoulu ʻia i laila. ʻO ka ʻoihana mahiʻai, he ʻoihana haʻaheo nō hoʻi. Inā nele lākou i ka mahiʻai ʻole, nele lākou i ka meaʻai ʻole. He mea nui ka hānai ʻohana.


ʻO Vaiavai ka inoa o ke kahawai o ke kauhale o Avera. Aia ʻo Avera ma ka hulina komohana i Rurutu, Polenekia Farani. No nā maka malihini, kaulana kēia mokupuni i nā koholā he nui e holo kokoke i ke kahakai. A no ka poʻe Polenekia, kaulana nō ia wahi i ke kalo ʻoi. Ua hoʻokolonaio ʻia lākou e Farani akā naʻe, mau nō nā hana a ka wā kahiko. E ori Rurutu lākou, e hīmeni Rurutu lākou, e ʻōlelo Rurutu lākou, a haʻaheo lākou iā Rurutu. No nā makahiki he nui, i hiki ʻole ke helu ʻia, mauʻaʻe ʻole ʻia nā ʻike a me nā hana kuluma o ka poʻe ʻōiwi. Waiwai ʻo Rurutu i ka ʻike kupuna a ola pono ka moʻomeheu. Ua kipa au i kēia wahi me koʻu hui mahiʻai kalo. A i ko mākou hele ʻana i Rurutu, "’ua oti te tapu," a ua puka aʻela ka ʻike.


I Rurutu, ʻaʻole hana ka wahine i ka pa’i taro (loʻi kalo). E hoʻomaʻemaʻe lākou i ka hale, e hānai lākou i nā keiki, a e ulana lākou i ka lauhala. ʻAʻole iā lākou e loaʻa ai ka meaʻai, ʻaʻole na lākou e hoʻomākaukau i ka meaʻai, a ʻaʻole lākou e ʻimi naʻauao. Inā he kāne ʻoe a e lawe ʻoe i kāu wahine i ka pa’i taro, e hoʻohilahila ʻia ʻoe. ʻO Viriamu Teuruarii ka mea nāna i lawe iā mākou i ka pa’i taro. A i kā mākou hana ʻana, ʻī maila ʻo ia "’ua oti te tapu." ʻAʻole i liʻuliʻu a hele mai nā mahiʻai ʻē aʻe a nīele. ʻAkahi nō lākou ā ʻike i ka hana o ka wahine i ka pa’i taro.


E kipa ana mākou i ka manawa o ka Heiva. ʻO ia hoʻi kekahi hoʻolauleʻa, e like me ka makahiki o ka poʻe Hawaiʻi. I kekahi lā, loaʻa ka hanana kuʻi kalo. Ua komo mākou i kēia hanana a ua hehi hou ʻia ke kapu. A i ke kuʻi kalo ʻana o Māhie Wilhelm, ʻo ia ka makamua o ke kuʻi ʻana o kekahi wahine i ka ʻai. Palena ʻole ka pūʻiwa o ka poʻe Rurutu. Ua pā paha ko lākou mau naʻau.


’Ua oti te tapu, a ua puka aʻela ka ʻike. Hiki wale nō kekahi moku ma Rurutu no ʻelua manawa o kēlā me kēia mahina. Lawe ua moku nei i nā mea like ʻole i Rurutu: ke kaʻa, ka pahu hau, ka lole, a me kekahi meaʻai, akā naʻe, liʻiliʻi wale nō. ʻAʻole e hilinaʻi ka poʻe Rurutu i kēia moku. E hoʻoulu lākou i ka meaʻai a lākou e ʻai ai. Aia he hoʻokahi alanui e kaʻapuni i ka mokupuni a ma kēlā alanui, ulu nā meaʻai like ʻole. ‘O kēia meaʻai, ʻai noa ʻia e ka lehulehu. Noho lākou ma ke ʻano he hoʻokahi poʻe, ʻaʻole lākou e kū kaʻawale. Inā ola pono ke kauhale, ola pono ke kanaka. E hana nā kāne i ka pa’i taro mai ka lā hiki ā ka lā kau. Akā, hana mālie lākou. Aia kekahi mahiʻai i kēlā me kēia ʻohana. E hoʻomākaukau pū lākou i ka ʻai a e pū paʻakai lākou me ka ʻohana holoʻokoʻa. E mālama nō lākou kekahi i kekahi. Ma muli o kēia aloha, ulu te taro hu’ahu’a, ke kalo momona. A monate nō, ʻono nō.


ʻO kēia ʻano o ka nohona, he koho ia. Loaʻa nā ʻenehana (ka iPhone, ka lolouila, nā pahu paʻi kiʻi) i ka poʻe Rurutu. Akā naʻe, ʻaʻole lākou e peʻe ma loko o nā paia ʻehā. Noho lākou i ka ʻāina. No ko mākou hale kipa ʻo Viriamu, he hale pule ka ʻāina. Hoʻomana ʻo ia i kona mau akua i ka hana ʻana i ka ʻāina.


ʻAʻole paʻakikī ka hānai ʻana i ka lāhui. ʻAʻole nā ʻaha kūkā a me nā kūkākūkā he mea e pono ai. E kanu i ka mea kanu i ulu ka meaʻai. Mai ʻōlelo iaʻu, "ʻAʻohe oʻu ʻāina!" ʻO Hawaiʻi a puni ko kākou ʻāina. E kanu kākou i nā meaʻai ma ke alanui, ma nā pāka, ma loko o ka poho mea kanu, a pēlā aku. A ʻo ka mea nui, mai hūnā i nā hua. E hāʻawi aku i ka ʻohana a me nā hoa noho. E aloha kekahi i kekahi.


​© Kuʻulei Kapule 2019