Pae ka Palaoa, Kapu ke Kai:
I Hewa i ke Aupuni





Beau Shishido





I ka lā ʻumikūmākahi o ʻIanuali, ua hele kino au i ka moku liʻiliʻi ʻo Mauliola e ʻike maka ai i ka palaoa i ili mai ma ke koʻa. ʻOiai, he mahele ʻo Mauliola no ke ahupuaʻa ʻo Honolulu, ua pae mai nō ka palaoa i ke ahupuaʻa oʻu e noho ai. I koʻu hōʻea ʻana i laila i ke kakahiaka, ʻakahi nō a ʻike kuʻu maka i kēia ʻano iʻa, he iʻa nui a hiwahiwa i ka nohona Hawaiʻi, a ʻakahi nō hoʻi a honi i ka pīlau o ka ʻiʻo. He pīlau hoʻi kau, kohu like me ke kūkae pulu i ke kakalina. Eia naʻe, ua maʻa nā kūpuna o ka wā kāhiko i kēia hauna, no laila, ʻaʻole au i ʻalo iki i kēia ʻala kakaʻikahi o ka hōʻea ʻana mai.

I ia manawa, ʻaʻole nui nā kānaka ma laila, no ka mea, ʻaʻole i kuʻi ka lono i ʻō a ʻō. Akā, hele mai hoʻi kekahi mau ʻelele mai ka Polynesian Voyaging Society ʻelua kānaka Hawaiʻi, he Kāmoa, a he Tuvalu. A ʻaʻole i liʻuliʻu, ua hele mai hoʻi kekahi waʻapā mai PVS e ʻike i kēia iʻa, ʻo Mark Kimura ke kāpena o ia waʻapā.

Ua kamaʻilio mākou e pili ana i nā palaoa, a laila, ua hoʻokokoke mākou i ka palaoa, ʻaʻole naʻe mākou i hoʻopā iki i ka palaoa, ʻaʻole hoʻi mākou e luʻu i ke kai. E kū ana mākou i ka ʻae kai.

ʻAʻole i liʻuliʻu, ua hele mai kekahi haole, he limahana manawaleʻa no NOAA, i hoʻokuleana ʻia ma lalo o ke Kulanui nei, a ua nuku ʻo ia iā mākou no ko mākou hoʻokokoke ʻana i ka palaoa, ma ka ʻōlelo ʻana mai lā, "ʻAʻohe a ʻoukou palapala ʻae, a ʻaʻole ʻoukou e hoʻokokoke i ka palaoa. ʻAʻe ʻia ke kānāwai o ke Aupuni ʻo ʻAmelika. Na mākou ka palapala ʻae, no laila, na mākou e hoʻokokoke a hoʻopā i ka palaoa."

A ma hope iho, ua kelepona ʻo ia i ka luna o NOAA a me DLNR, a ʻemo ʻole, ua hele mai kekahi mau mākaʻi ma kahakai, e kau ana nō i luna o nā kalaka, a ma kahi moku nō hoʻi. Haʻi maila nā mākaʻi kau moku o ka DLNR iā Mark Kimura mā, ʻaʻole lākou e lana ma laila, a kaʻi ʻia lākou i ka haʻalele ʻana. A ua hele mai nā mākaʻi ma ke one (he mau haole lāua), a kauleo lāua iā mākou, ʻaʻole e kū ma ka ʻae kai, a laila pāpā ʻia ka ʻae kai i ke kū ʻana o ka leki pāpā. Akā, ma muli o ka palapala ʻae i loaʻa i ka lima o nā haole, ʻo lākou ke kū mau ma laila.

I kēia pāpā ʻia, ua ʻeha koʻu naʻau, me he mea lā, ua kū maoli kuʻu naʻau i ka pahi. I ke kamaʻilio ʻana me nā mākaʻi DLNR, ua hoʻohāmau ʻia ko mākou leo, ka leo o ka ʻōiwi. ʻAʻole lākou i nānā i ko mākou kumu no ke kū ʻana ma kahi o ka palaoa ʻo ko mākou kū wale ʻana nō i laila ka hewa, me he mau pōpoki pae hewa lā, pono e kipaku. Eia naʻe, i ke kakahiaka nui o ia lā, ma mua o ka hoʻāʻo ʻana o DLNR e kauō i ka palaoa, ua hoʻokokoke mai kekahi "kahuna" o ua hui nei, a oli ʻo ia no ka hoʻopakele ʻana i kā DLNR hoʻokokoke ʻana a me ke kauō ʻana aku i ka palaoa. Akā, i loa nō a hoʻomaka ke kauō ʻana, ʻo ka moku wale ihola nō ia o ke kaula. He hōʻailona paha kēia no ka ʻae ʻole ʻia o kāna oli. Akā pehea ke oli a mākou kānaka Hawaiʻi? Pehea hoʻi kā mākou ʻōlelo? ʻAʻole i ʻike ʻia kahi hōʻailona no ka hōʻole ʻana a nā akua iā mākou. Akā, ma muli o ka nele ʻana i ka palapala ʻole, ʻaʻole i ʻae ʻia e nā haole. Auē! ʻEhia mea aloha o nā kānaka maoli o kēia pae ʻāina nei?
© Beau Shishido 2019