Kāua i ka holoholo
na Leilani Chow

ʻAuhea ʻoukou e nā kānaka puni i nā ʻano holoholo like ʻole, ʻo ka luʻu kai ʻoe, ʻo ka ʻau kai ʻoe, ke kuʻi ʻopihi ʻoe, ka ʻohi limu ʻoe, ka heʻenalu ʻoe, a me nā ʻano lawaiʻa like ʻole o nā kai ʻewalu. I kou holoholo ʻana i kai he aha kāu e ʻōlelo ai? He ʻōlelo paha kāu? A i ʻole he mū hoʻi kāu? Inā he ʻōlelo kāu, he waha heʻe paha? He aha lā ke kumu? He pepeiao ko ka iʻa? I kēia mau lā, he mea maʻamau ka ʻōlelo "holoholo", akā, no ke aha mai kākou e hoʻopuka ai i ia hua ʻōlelo? 

Ma ka moʻolelo no ka iʻa hāmau leo o ʻEwa, aʻo mai kākou i ke koʻikoʻi o ka hāmau leo i ka ʻohi ʻana i nā pipi. Ma ka ʻōlelo noʻeau "he pepeiao ko ka iʻa" ʻike kākou i ka lohe a me ka hoʻomaopopo ʻana o nā iʻa i kā kākou ʻōlelo ʻana. Ma ke kaʻao ʻo Punia a me ka poʻe manō ʻo Kaiʻaleʻale mā, ʻike kākou he mau pepeiao nō hoʻi ko ka manō, a e aho paha ka waha heʻe ke hele kākou i ka lawaiʻa. Akā, ma mua o ko kākou hōʻea ʻana i kahakai haʻi aku kākou i nā kamaʻāina, "E holoholo ana au," a i ʻole, "E hele ana au i ka holoholo." No ke aha mai? ʻAʻole anei ka iʻa ma loko o ke kai? ʻAʻole paha e lohe ʻia ko kākou mau leo mai kahi mamao mai. Eia ka moʻolelo a koʻu ʻanakē i haʻi mai ai e pili ana iā Molokaʻi a me ka hoʻopuka ʻia ʻana o kēia ʻōlelo ʻo holoholo, ʻaʻole no ka iʻa wale nō o kai. 

I ka wā kahiko, ma ka mokupuni ʻo Molokaʻi, hōʻea maila kekahi malihini i ke ahupuaʻa ʻo Kainalu. Aia kēia ahupuaʻa manaʻe o ka mokupuni ma waena o nā ahupuaʻa ʻo Kawaikapu a me Puinuohua. ʻAno ʻē kēia kanaka no ka mea komo ʻo ia i ka ʻahu i nā manawa a pau a noho ʻo ia ma kapa o ke ala nui i kēlā me kēia lā. Nīele aku ʻo ia i nā mea e hele wāwae ana ma ke ala hele i ka lākou e hana ai a pane maila nā kamahele iā ia. 

I kekahi lā, ua nīele aku kēia kanaka ʻē i nā keiki e hele wāwae ana, "I hea ana ʻoukou?" A pane mai nā keiki, "E hele ana mākou i kēlā pōhaku nui no ka ʻau kai ʻana." Ma hope iho, nanahu maila ka manō, pau nā keiki i ka make. Auē nō hoʻi ē! 

I ia lā aʻe, ua hele wāwae ka lawaiʻa ma ke ala hele a nīele hou ke kanaka ʻē, "I hea ana ʻoe?" Pane maila ka lawaiʻa, "Ke hele nei au i kēlā kūʻono me kaʻu ʻupena." A ma hope iho, nanahu maila ka manō, pau ka lawaiʻa i ka make. Auē nō hoʻi ē! 

I ia lā aʻe, e hele wāwae ana nā ʻōpio ma ke ala hele a nīele hou akula ke kanaka ʻē, "I hea ana ʻoe?" Pane maila nā ʻōpio, "E hele ana mākou i kai no ka heʻenalu ʻana." A i ko lākou heʻenalu ʻana, nanahu maila ka manō, pau nā ʻōpio i ka make. Auē nō hoʻi ē! 

Kaumaha loa ko Kainalu. ʻEha ko lākou mau puʻuwai i ka hoʻi ʻole ʻana mai o ua mau ʻohana nei mai ke kai mai. Hele a huhū ka poʻe o laila, a lilo lākou i ka huoi no ke kanaka nīele me ke ʻahu. Kauoha akula lākou i ka malihini, penei, "E hemo kou ʻahu." ʻO ka mahuka aʻela nō ia o ka malihini, me ka pane ʻole ʻana mai! Hopu ʻia auaneʻi ia kanaka a i ko lākou wehe ʻana i kona ʻahu, ʻike ʻia akula, aia he waha manō ma kona kua! Maopopo ʻia aʻela, ʻo ia ka mea nāna i nanahu aku a make ko lākou poʻe ʻohana ma ke kai, a no laila ua puhi ʻino ʻia ka malihini i ke ahi a hiki i kona make loa ʻana. Paepae nā poʻe i nā pōhaku ma luna o kona kino a kapa ʻia kēlā puʻu ʻo Puʻuomanō. No ia mea, ʻaʻole i haʻi aʻela ka poʻe kahiko i ka lākou e hana ai ma kai, a hoʻopuka ʻia ka hua ʻōlelo ʻo "holoholo". 

© Leilani Chow . 2017

© kauluhoi 2017