He Akaʻula mai Molokaʻi Mai
na Leilani Chow

E nā Hawaiʻi! E ui aku ana au iā ʻoe, aia i hea ka makani a kākou? Nā makani pāhili e kiaʻi ana ma luna o kēia ʻāina aloha, nā makani i alakaʻi pono nō i ke ʻino a me ka mālie o ke aupuni, nā makani i hōʻuluʻulu a hoʻākoakoa mai i nā ao kaʻalelewa i hoʻomāmalu ʻia ai kākou mai nā kukuna kuni o kēia lā, ka mea hoʻi nāna i lawe mai i ka ua mai ka lani mai. Ua pau ka mālama ʻana o nā makani iā kākou, a hala aʻe paha i ka wā ma mua? A i ʻole ke kali nei lākou ma waho pono o ko kākou ʻike, ke kali nei ʻo ka hea ʻana o kākou? Ma ka lā 17 o Malaki i kēia makahiki nei, ua kāhea hou nā haumāna mai ka mokupuni ʻo Molokaʻi iā kākou a pau no ka hōʻikeʻike kula ʻo PRISM Symposium o ke kula waena a me ke kula kiʻekiʻe ʻo Akaʻula. Nui nā mea kupaianaha o kēia kula, e laʻa: ka moʻohaʻawina (curriculum) o kēia kula, a me ka hōʻikeʻike ʻia ʻana e ke kula holoʻokoʻa ke ala o ka hea makani. 

Ua kapa ʻia kēia moʻohaʻawina ʻo IEEIA e Kauka Harold Hungerford a me Trudi Volk. Na lāua e noiʻi mau i ke aʻo ʻana aku i ka Environmental Education (ke aloha ʻāina) i nā haumāna o ka honua. I ko lāua manaʻo, hemahema ke aʻo ʻana aku i ke aloha ʻāina ma nā kula o ka wā ma mua, a me kēia wā, no ka mea ua hewa nā hana a nā haumāna i lilo i mākua — ʻaʻole kākou i mālama pono i ka honua. Ma nā kula maʻamau, penei e aʻo ʻia ai ke aloha ʻāina: ʻo ke aʻo ʻana mai ka mea mua, ʻo ka makaʻala ʻana i nā pilikia o ka ʻāina ka mea ʻelua, a ʻo ka hopena o ke aʻo ʻana a me ka makaʻala ʻana, ʻo ia ka ʻike ʻana i ka hana kūpono e maikaʻi ai nā kānaka a e mālama ʻia ai ka ʻāina. I koʻu lohe mua ʻana i nā mea ʻekolu ua noʻonoʻo wau, he manaʻo pololei kēia, akā wahi a nā kānaka noiʻi ʻepekema ʻaʻole lawa ke aʻo wale ʻana nō. 

Kūʻokoʻa ka moʻohaʻawina IEEIA (Investigating and Evaluating Environmental Issues and Actions) no ka mea, nānā pono kēia i ka pilikia ma ka ʻāina, ka hāʻina, a me ke alahele o ka hana ʻana. Wahi a Kauka Hungerford lāua ʻo Trudi Volk, ʻo ka mea mua loa ka ʻike a me ka hoʻomaopopo ʻana i nā pilikia o ka ʻāina; ʻalua, ka ʻimi ʻana i ka hāʻina; ʻakolu, ka mākau kaʻakālai o ka hana pono no ka hāʻina i kūlia ʻia. ʻAno like kēia kaʻina hana me ko nā kula ʻē aʻe akā ma kēia papa haʻawina, ʻaʻole ke aloha ʻāina he kumuhana kaʻawale. E like me ka hoʻonaʻauao ʻana o nā kānaka maoli, wili ʻia nā kumuhana a pau i loko o ke aloha ʻāina! Ma hope iho, aia hoʻokahi mea i koe no ka paʻa pono ʻana o kēia moʻohaʻawina, he mea i hiki ʻole i nā kumu ke aʻo aku, ʻo kēia ka ʻume mageneti o ke aloha ʻāina. 

Ua hoʻomaka ʻia ka papa hōʻike ʻo PRISM (Providing Resolutions with Integrity for a Sustainable Molokaʻi) i ka makahiki 1997 e Kumu Victoria Newberry lāua ʻo Kumu Dara Lukonen, a i ka makahiki 2003 ua lilo kēia papahana kūʻokoʻa i kula hou, ʻo Akaʻula ka inoa. Aʻo aku kēia kula ma o ka ʻike a Kauka Hungerford me Trudi Volk, a me ke alakaʻi ʻana a Kumu Newberry lāua ʻo Kumu Lukonen. Nānā pono nā keiki o Molokaʻi i nā pilikia kikoʻī o ka ʻāina e like me ka nui o nā holoholona maiʻao, ka ʻaʻaiawā ʻana o ka ʻāina, ka hoʻokeʻokeʻo ʻia ʻana a me ka hoʻohaumia  ʻia ʻana o ka hāpapa, nā pilikia o nā pōpoki ʻōhuka, ka oxybenzone, ka polystyrene, ke kukunaokalā ʻulaʻula, a pēlā wale aku. Kuhikuhi nā haumāna i nā pilikia nui i kā lākou kuanaʻike. No ke kau holoʻokoʻa, ʻimi lākou i hopena a i hāʻina mai nā ʻāina a pau a anamanaʻo aku nā haumāna i nā kupa o Molokaʻi. I ka pau ʻana o ke kau, hōʻikeʻike manaʻo nā huina haumāna i kā lākou pilikia i noiʻi ai, ka hāʻina a lākou e kuhi ai, ka manaʻo o ka lehulehu e pili ana i ka pilikia a me ia mau hāʻina, a me ke ala hele o ke kūlia ʻana i ka hopena kaʻakālai! Haele mai nā kupa o Molokai i kēia hōʻikeʻike kaulana no ka hoʻolohe ʻana a me ka nīnau ʻana aku i nā ʻōpio. He ʻaha aloha ʻāina maoli nō kēia!

Penei ka hoʻāla ʻana mai o nā alakaʻi poʻo noʻo, nā koa i pane i ke kāhea o ke kuleana, nā haumāna i mālama pono i ka ʻāina, a me nā makani e kali nei ʻo ka hoʻoponopono. Nui nā kula e aʻo nei ma o kēia moʻohaʻawina ʻo IEEIA, akā hoʻokahi wale nō ma Hawaiʻi. Like ā like kēia aʻo ʻana ma o ke aloha ʻāina me ke ʻano o ke aʻo ʻana i ka wā ma mua. Kūpono paha kēia kula ma Hawaiʻi no ka mea he poʻe aloha ʻāina kākou, a na ia kaila o ke aʻo ʻana e hōʻike hou iā kākou i ke kāhea ʻana a me ke kuleana i loko o kākou poʻe o Hawaiʻi nei. Noke mau ke kula ʻo Akaʻula me ka mehameha i kā lākou hana a i kā lākou kāhea ʻana mai i nā makani. No laila, e pane mai! 

 © Leilani Chow . 2017

© kauluhoi 2017