He aha nā manaʻo o loko o nā lepili māhuaola?
NA Nāihe Paʻaluhi

Wahi a kahiko, “ʻAʻohe lau komo ʻole,” ʻo ia hoʻi, ʻaʻohe nānā iki o haʻi i ka ʻai e moni iho ana i loko o ka puʻu, ʻo ka māʻona wale nō ka pahuhopu. I ka noʻonoʻo Hawaiʻi, ʻo ka maʻemaʻe o ka ʻai paha ke noʻonoʻo ʻia i kēlā ʻōlelo noʻeau. Eia naʻe, i kēia au hou e hiki ai iā kākou ke kākepakepa mai i kēlā ʻōlelo i ka pōʻaiapili o ka ʻai ʻana i ka mea ʻai hāʻehuola, ʻo ia hoʻi ka ʻai i maikaʻi no ke ola kino. ʻAʻole nō hoʻi kēia e paipai aku nei iā kākou e paʻa ka waihona noʻonoʻo i kekahi papa hoʻēmi kino. ʻO ka nānā pono ʻana i kāu ʻai ka manaʻo nui. Wahi a ka poʻe ʻepekema, ʻoi aʻe ka maikaʻi o ka ʻai hāʻehuola i haʻaliu ʻole ʻia ma luna o ka mea ʻai hiki wawe a me ka ʻai i lepili ʻia. ʻAʻole nō i hoʻohui ʻia nā ʻano mea ʻōlelo ʻepekema like ʻole o ka ʻōlelo haole i hiki ke heluhelu ʻole ʻia a i ʻole ʻōlelo ʻia. No laila, i ka nānā ʻana aku i ia mau lepili, he aha nā manaʻo o loko? E waele aku kākou i kekahi o nā ōpū manaʻo huikau i hiki nō ke hoʻonaʻauao ʻia ka nui manu.

I ka nānā ʻana aku i nā lepili māhuaola, hiki nō ke ʻike ʻia nā ʻano ʻōlelo like ʻole: “made with organic ingredients,” “high or rich in,” “all natural,” “made with whole wheat,” “more/fortified with,” a pēlā wale aku. Kuhi pāʻēʻē iki kēia mau ʻōlelo i ka poʻe kūʻai mea ʻai. Eia naʻe, hoʻonoho ʻia kekahi o nā ʻōlelo o nā lepili e ka FDA, ʻo ia hoʻi ka Food and Drug Administration o ʻAmelika Hui Pū ʻIa. No ka hoʻākaaka ʻana i ia mau manaʻo huikau, eia mai he wehewehe iki o nā lepili i hoʻonoho ʻia: no “made with organic ingredients,” he 70% ka liʻiliʻi o nā mea ʻokanika i hoʻohui ʻia i loko o ia mea ʻai, ʻaʻole nō paha he ʻokanika ka mea holoʻokoʻa. No “high or rich in...” he 20% wale nō ke koina o nā mea ʻai i hoʻohui ʻia a i lepili ʻia i loko o ia mea ʻai e laʻa me nā witamina ʻoiai e noʻonoʻo ana nā kānaka i ka piha o ia ʻai i ia witamina. No “all natural,” mai kēlā kumu mai nō hoʻi ka mea ʻai a me kona ʻono, ʻaʻole i haʻaliu ʻia. I ka heluhelu ʻana i ka hua ʻōlelo natural, puapuaʻi aʻe nā manaʻo maikaʻi no ia ʻai. Akā nō naʻe nui aʻe paha ka ʻailakele, ka paʻakai, a pēlā aku nō i loko o ia mau ʻai no laila ʻaʻole paha maikaʻi ia no ke ola kino. No “made with whole wheat,” he liʻiliʻi wale ka nui o ke koina whole wheat e hoʻohui ʻia i hiki ke kū mai kēia lepili, hiki ke hoʻohui ʻia nā mea haʻaliu me ka whole wheat. No “made/fortified/enriched with,” pono he 10% wale nō o ka recommended dietary allowance o ka māhuaola i hōʻike ʻia e kū ai kēia lepili. I ka noʻonoʻo o ka poʻe kūʻai, he ʻai hāʻehuola ke kū mai ka manaʻo o made/fortified with akā he liʻiliʻi nō ka māhuaola i loaʻa. 

Ma ka halekūʻai, aia ka ʻai hāʻehuola i ka pelihele o ka hale. ʻO ia mau ʻai, he ʻai i haʻaliu iki ʻia a i ʻole i haʻaliu ʻole ʻia. ʻAʻohe lepili o ka hapa nui o lākou. Aia ka ʻai i lepili ʻia i ma nā ala o waena o ka halekūʻai. Wahi a kekahi kumu, ʻaʻole nō kuʻu ka hanu o kānaka i ka pono ʻai ʻana, make nō i nā maʻi o ia pono ʻai ʻana a i ka hapa nui o ka manawa, ʻo ia ka ʻai ʻana i ka ʻai i ʻoi aʻe kona haʻaliu ʻia ʻana, ka ʻai i lepili ʻia. ʻO nā maʻi e make ai ʻo kānaka pono ʻai, ʻo ia hoʻi ka maʻi puʻuwai, ka maʻi ʻaʻai, ka maʻi kōpaʻa, a pēlā nō. E hoʻonaʻauao mai no ke ola kino o kākou e ola ai nā pulapula, e ulu ai nā pua, e kū ai ka mana, a e mau ai ka lāhui. No laila, e ka lehulehu heluhelu, he wahi leo nīele kēia e noi aku nei iā ʻoukou, he aha kā ʻoukou i ʻai iho ai i kēia lā? Ua ʻai ʻē ʻia paha kekahi ʻaina e ʻoe? No ke aha mai ʻoe i koho ai i kēnā mea ʻai? He lepili māhuaola ko ia ʻai?

© Nāihe Paʻaluhi . 2018

© kauluhoi 2017