NĀ kamaliʻi ʻike ʻole
NA kawailehua hamberg

ʻAuhea ʻoukou nā haumāna e lalau ana i nei kahua o ka naʻauao, iā ʻoukou ka poʻe maka pō i ka hewa o nei au o ka manawa, e nā kamaliʻi ʻike ʻole. Eia ʻoukou nā haumāna e nānā ʻole ana i ka ʻoiaiʻo o kēia aupuni ʻo Hawaiʻi ā ʻoukou e noho naio ana i kēia mau lā, e kakaʻa paha nā maka ā ʻike ai i ka hewa o kāu hoʻomau ʻana i kēia kuanaʻike kolonaio o ʻamelika. 

ʻO ka lā ʻumikūmāhiku o Ianuali ka lā a mākou, ka poʻe Aloha ʻĀina, e aumihi ana i nā makahiki he 125 i piha mai ka hoʻokahuli ʻia ʻana o Hawaiʻi a me kō mākou mōʻī wahine ʻo Liliʻuokalani e ʻamelika. Ma ia lā nō i mālama ʻia ai ʻelua mau ʻaha e aumihi ana i kēia lā koʻikoʻi o mākou. Hoʻomaka akula ka ʻaha mua o ia lā ma ke ʻano he paikau kūʻē mai Mauna ʻAla mai ā i ka Hale Aliʻi ʻo ʻIolani. A mālama ʻia ka lua o nā ʻaha aumihi o mākou poʻe Aloha ʻĀina i ka piko o nei kula nui i laha hou ai ka manaʻo nui o kēia lā i ka lehulehu haumāna o nei kula e kiaʻi ana i ka ʻike o kākou nā haumāna o nei kula nui. ʻO ka naʻauao hoʻi, he ala kīkeʻe loa ia o ka hoʻokahua ʻana aʻe i kou kuanaʻike ponoʻī. Ma ka piko o kēia Kula Nui nei i hoʻomaka ai kēia ʻaha hoʻomanaʻo, eia naʻe i ka haʻi hou ʻia ʻana i nā ʻōlelo haʻi waha mua ia e Kumu Haunani Kay-Trask ma ka makahiki 1993, ua pili loa aku nō i ka Hale Aliʻi ʻo ʻIolani. Penei ka ʻōlelo, “WE ARE NOT AMERICANS! WE WILL NEVER BE AMERICANS! WE WILL DIE AS HAWAIIANS.” Ua haʻi mua ʻia kēia mau huaʻōllo ma ka paikau aumihi o ka makahiki 1993 ma ka hale Aliʻi ʻIolani, akā mau nō kona pilina i ke au nei.

E kuʻu mau hoa Aloha ʻĀina, ua kamaʻāina mua paha kēia mau huaʻōlelo iā ʻoukou, a he mea ia e hoʻoulu ai i ka ʻeleu a me ke kūpaʻa o kākou. Ua lilo naʻe ia i mea i hoʻonāukiuki ai i ʻelua mau haumāna ʻamelika o kēia kula e hoʻolohe ana iā mākou. ʻOiai he ʻoiaiʻo nō kēia mau ʻōlelo, ʻo ka mea ʻāpiki hoʻi, ʻo ia ka naʻaupō o ʻelua mau keiki ʻike ʻole e kūnānā ana iā mākou mai kaʻe o ka hale peʻa, kahi a ka poʻe Koa Aloha ʻĀina i hoʻolaha ai i kēia mau ʻōlelo.  ʻO kēia mau keikikāne ʻelua, he mau haumāna lāua ma nei kula nui a ua komo pū hoʻi lāua i loko o kekahi papa ʻIke Hawaiʻi. No laila, me he lā ua manaʻo lāua lawa ka ʻike. Eia naʻe ua kākaʻa aʻe nā maka i ka ʻoiaʻiʻo?  ʻAʻole paha.  Iā lāua e hoʻolohe ana i nā huaʻōlelo ʻoiaiʻo i haʻi ʻia ma ka ipuleo, ua piʻi nō ka inaina i loko o ko lāua mau naʻau me ka nānā pū ʻana iā mākou me he lā ʻo mākou ka poʻe e pale ana i nā maka a nalowale ka ʻoiaʻiʻo o kēia au! I kā lāua hoʻokokoke ʻana mai i kahi o ka hale peʻa, manaʻolana mākou Koa Aloha ʻĀina ʻo ka hoʻonui ʻike paha kā lāua ʻoiai nīele ana lāua iā mākou e wehewehe i kēia ʻōlelo kūʻē i haʻi ʻia ma ka ipuleo. ʻAʻole kā hoʻi ia ʻo ka pahuhopu o kēia mau keikikāne ʻike ʻole ʻelua. ʻO ke kikoʻolā wale nō ke ʻano o ua mau haumāna ʻelua nei i ʻike ʻole i ka ʻoiaiʻo. 

“ʻO ʻoukou hoʻi kai ʻōlelo, "WE ARE NOT AMERICANS! WE WILL NEVER BE AMERICANS!" ma kēnā ipuleo?” i ʻōhumuhumu maila ke keiki ʻike ʻole mua i kekahi o nā poʻe Koa Aloha ʻĀina, a pane mai kekahi o nā koa iā ia, “ʻAe ʻo mākou ka mea i ʻōlelo pēlā ʻoiai ʻo kēia lā nei ka lā e aumihi ai i ka hana hewa a me ka noho hewa mau ʻana o ʻamelika ma luna o Hawaiʻi.” A pane maila kēlā keiki ʻike ʻole mua penei, “Inā ua hānau a hānai ʻia ʻoe ma nei ʻāina ʻo Hawaiʻi, he ʻamelika ʻoe. E aho kou kū haʻaheo ʻana i kou aupuni ʻo ia hoʻi, ʻo ʻAmelika.” Eia naʻe me ka mālie a me ka haʻaheo i pane aku ai ke Koa Aloha ʻĀina iā ia, “inā he haumāna ʻoe ma nei kula a e noho ana ʻoe ma nei ʻāina e aho kou aʻo ʻana i ka moʻolelo ʻoiaʻiʻo o nei ʻāina.” Akā ua mau nō hoʻi ka naʻaupō o ua mau keikikāne nei a paāne maila penei “Ua lawa koʻu ʻike! Aia nō kākou ma ʻamelika, ma ke aupuni alakaʻi ʻia e Trump!” I ko mākou lohe ʻana i kēia mau ʻōlelo hūpō a ua haumāna nei ua ʻike leʻa nō, e kūpaʻa nō hoʻi lāua i kō lāua kuanaʻike hewa. I ʻolaʻolā no ka huewai i ka piha ʻole!

© Kawailehua Hamberg . 2018

© kauluhoi 2017