E Hoʻomālie
NA Haukea Hokoana

ʻO ka mea maʻa mau i nā haumāna, paila maila ka haʻawina he nui ma luna o kākou a ʻaʻole kākou e hoʻomaha, aia a maʻi, a laila ʻo ia ka wā e hoʻomaha ai i ko kākou mau kino. ‘Aʻole maikaʻi kēia ʻano o ke ola ʻana, i kekahi manawa e maʻi ana kākou a laila pono kākou e hiamoe no kekahi mau lā. Pono kākou e mālama i ko kākou mau kino, no laila e hoʻoikaika kino paha, ʻai i ka meaʻai hāʻehuola, a pēlā aku. I ka manawa pilikia nui a ‘aloʻahia ʻino, piʻi ka huhū i loko a ʻaʻole noʻonoʻo ʻia ka hopena o ia mau pilikia o ke kino. Aia kekahi mau ala maʻa mau no ka hoʻokuʻu ʻana i kēia mau pilikia, e laʻa: ka hoʻoikaika kino ʻana, ka hele wawae ʻana, ka noʻonoʻo pono ʻana, a me ka ʻai i ka mea ʻai pono no ke kino, a pēlā aku. Akā, eia kekahi mau manaʻo hoihoi āu i noʻonoʻo ʻole ai paha ma mua: ka honi ʻana, ka nau kamu ʻana, ka pūliki ʻana, ka ʻai ʻana i ka meaʻai me ka Potasiuma nui.

‘O ka mea e hoihoi nui iaʻu, wahi a Meridith Melnick, he alakaʻi ola kino, ‘o ka honi ʻana ka mea e lapaʻau ana i ka ʻaloʻahia a he mea ʻoiaʻiʻo nō. Ke honi ʻolua ʻo ka ipo, hoʻokuʻu ʻia nā Endorphins i ka lolo, a hauʻoli maila. No laila, i ka manawa e hiki mai ai ka ʻaloʻahia, a ma hope paha o ka hōʻike nui a me ka wā loʻohia, a makemake ʻoe e hoʻomālie i kou kino e kelepona i ka ipo a e hoʻomaka i ka honi ʻana.

ʻO kekahi mea hoihoi ‘ē a’e, ʻo ia hoʻi ka nau kamu ʻana, no ka hoʻonā ʻana i ka hopohopo nui. Maliʻa paha, ma mua o ka hōʻike a i ʻole ka hoʻihoʻi ʻia ʻana o ka hōʻike, nui ka hopohopo e piʻi ana i loko o kou kino ponoʻī no laila he mea nui a he kōkua ka nau kamu ʻana. 

Ua hana ʻia nō hoʻi kekahi mau hōʻike no ka hoʻonā ʻana o ka pūliki i ka loʻohia (https://www.ncbi.nlm.nih.gov/pubmed/12241092). Wahi a ia mau hōʻike, e hoʻomālie ʻia ana nō ke kino a e poina ana paha ka mea e hopohopo ai. Akā, ʻo ka mea hoihoi o kēia pūliki ʻana ʻaʻole like ka hopena ke pūliki ʻia kekahi kanaka ʻē, aia nō a pūliki ʻia kahi mea āu e aloha ai, e like me kou mākua a i ʻole kāu ipo, kou tūtū paha, a pēlā aku, a laila e emi mai ana ka hopohopo. I ia wā e hoʻokuʻu ʻia ai ka Neuropeptide Oxytocin i loko o kou lolo. ʻO ke kuleana o ia mea ka hoʻopili ʻana iā ʻoe me kēlā kanaka i aloha ʻia. Nui ka hoihoi o kēia ʻano o ka hoʻomālie ʻana i ke kino a me ka lolo.

Eia kekahi, inā loʻohia ʻoe, e ʻai i ka maiʻa a i ʻole ka ʻuala. Nui ka Potasiuma i loko o ia mau meaʻai ʻelua a e hoʻokuʻu ana ka Potasiuma i ka ʻaloʻahia. Ke nui ka loʻohia, e hoʻonui ʻia ana nō hoʻi kou loaʻa ʻana i ka maʻi mīkā koko a me ka maʻi kauhola a no laila nā ka Potasiuma e hōʻalo i kēia mau maʻi. Ma hope o ka hōʻike a i ʻole ma mua, e ʻai i ka maiʻa no ka pale ʻana o ke kino i ka maʻi. 

He wā kēia i nui ai ka hana a me ka loʻohia. E mālama kākou haumāna i ko kākou mau kino a me ka noʻonoʻo hoʻi.

© Haukea Hokoana . 2018

© kauluhoi 2017