Loaʻa i ke Aloha ka Lei o ka Lanakila
NA Kaleo Pinto

He wā hulihia kēia. Ua loaʻa i ke kāmaka mua loa e kū no ʻAmelika ka mekela keleawe ma Nā Pāʻani ʻOlumepika Hoʻoilo, ʻo ia hoʻi ʻo Adam Rippon. I kēia lā, koe aku kekahi mau kānaka, laha ʻia ka manaʻo no ka hoʻokāmaka ʻana ē, he hewa a he ʻino kekahi. He makeʻe kūlana ka Pelekikena ʻo Donald Trump a ʻo kona hope, ʻo Mike Pence hoʻi, a paʻa iā lāua kēia ʻano manaʻo hoʻohalahala kāmaka. He mau kāne hoʻi lāua e kūʻē nui aku i ka male ʻana o ke kāne me ke kāne. Wahi a lāua, he ʻano maʻi ia aloha no laila, kākoʻo hoʻi lāua i ke kiʻi ʻana e hoʻohulihuli i ke ʻano o nā māhū like ʻole i ka lapaʻau hoʻomiki uila ʻana (electric shock therapy). Auē nō hoʻi ē. ʻO wai ke ʻino ʻoiaʻiʻo o kēia ʻano hana? Nā māhū a i ʻole nā "kauka?" 

Ma nēia pae ʻāina ʻo Hawaiʻi, he mea maʻamau i ko kākou mau kūpuna ka pili ʻana o ke kāne me ke kāne, a pēlā pū ka wahine me ka wahine. ʻIke ʻia kēia ʻano hana i ka wā kahiko i ka moʻolelo ʻo Hiʻiakaikapoliopele, i pili me kāna aikāne ʻo Hōpoe. He mau moʻolelo nō hoʻi no ko Kamehameha pili ʻana me nā aikāne āna. Ma ʻAmelika naʻe, he huakaʻi keu a ka paʻakikī ka ʻimi ʻana i pono no nā māhū. Ma muli o ka nui o ka hoʻohuli manaʻo o nā mikionali Kalikiano, ua pāpā ʻia ka male ʻana o nā māhū. I ka makahiki 1924 ma Kikako, ua hoʻomaka ʻia e Henry Gerber ka hui mua e kākoʻo i ka poʻe māhū. ʻO ua Gerber nei, he eʻe moku hoʻi ʻo ia no Kelemānia mai. He hui hoʻi kēia e kūʻē aku i nā lula e pāpā ana i nā māhū, ʻaʻole e male. Ua hoʻopau ʻia kēlā hui i ka makahiki 1925 ma muli o nā loea kālai ʻāina i kēlā wā. ʻO kēlā nō ka manawa mua o ka puka ʻana o nā māhū ma ʻAmelika. Mai kēlā mua aku, ua hoʻomaka ʻia nā hui like ʻole i kūʻē aku no ka pono o nā kānaka a pau me ko lākou kuleana o ke aloha. I ka makahiki 1993, ua kuhi pono ʻia aku ka hewa i loko o ke Kumakānāwai o ʻAmelika e ke ʻaha nui loa o Hawaiʻi. Wahi a ua ʻAha nei, he hewa hoʻi ka hōʻole ʻana i ka ʻiʻini o kekahi kāne e male aku i ka mea āna i aloha ai, he wahine, a he kāne paha. Akā naʻe, ua kūʻē ʻia kēlā manaʻo ulu wale a pāpā ʻia ka male ʻana o nā māhū i ka makahiki 1998. Eia kā, i ka makahiki 2015, ua ʻī maila ka ʻAha Kiʻekiʻe he hewa nō ia hōʻole male ʻana. 

I kēia wā, mau nō ke kūʻē ʻana o nā moho Repubalika i kēia ʻano pilina, ʻo ka hapanui o lākou, he mau Kalikiano hoʻi. E like me kai ʻōlelo ʻia, he mea ʻuao ʻo Mike Pence no ka hoʻopāpā aku i nā kāmaka, ʻaʻole e male. A, nui nā kānaka like ʻole e kūkū ana i kēlā ʻano manaʻo. Ma Kōlea Hema, i ka Pāʻani ʻOlumepika Hoʻoilo i hala aʻe nei, ua loaʻa ka lei o ka lanakila iā Adam Rippon, ka māhū mua loa i kū no ʻAmelika i ua mau Pāʻani nei. He mea hoʻouluulu ʻo Rippon i kēia hakakā a ua hoʻāhewa hoʻi ʻo ia i kā Pence alakaʻi ʻana i ka hui ʻālapa no ʻAmelika i kēia mau Pāʻani. Wahi a Rippon, he ʻino kēia no ka mea, kākoʻo ʻia kekahi mau lālā o ka hui akā naʻe, ʻaʻole kākoʻo ʻia nā kānaka a pau. No laila, hōʻole ʻia kekahi kono e Adam Rippon e huipū aku me Mike Pence i ko lāua noho ʻana ma Kōlea. Ua ʻī aku ʻo Rippon, "If it were before my event, I would absolutely not go out of my way to meet somebody who I felt has gone out of their way to not only show that they arenʻt a friend of a gay person but that they think theyʻre sick… He (Pence) seems more mild-mannered than Donald Trump… But I donʻt think the current adminstration represents the values that I was taught growing up. Mike Pence doesnʻt stand for anything that I really believe in." He mea nui kēia no ka mea, ke kūʻē nei lāua (me kona hoa ʻo Gus Kenworthy, kekahi ʻālapa ʻOlumepika ʻē aʻe no ʻAmelika, a he māhū kekahi) i ka mana nui loa o ʻAmelika. Nui ko lāua ikaika i kēlā hōʻole ʻana aku. 

E ka mea heluhelu, he kuleana kā kākou a pau loa no ke aloha ʻana i ka mea a kākou e koho ai. He pono sivila ia no nā kānaka a pau o kēia honua nei a ʻaʻole pono ka hoʻāhewa ʻana aku iā haʻi no ke ʻano o kona aloha. Ua ʻae maila ke Aupuni o ʻAmelika i ke kuleana o ka male ʻana, eia kā, mau nō ka hakakā ʻana no ka holomua o kākou. 

© Kaleo Pinto . 2018

© kauluhoi 2017