Mai ka ʻEhu Kakahiaka a i ka ʻEhu Ahiahi
na Miki Cook

Mai ka wā a ka Mōʻī Kauikeaouli i hoʻokumu ai i nā kula aupuni o Hawaiʻi nei a hiki i ka wā i kū ai nā kula Pūnana Leo, e neʻe ana nō ka ʻōlelo i mua. Mai ka wā a ke Aliʻi Wahine Keʻelikōlani i ʻonipaʻa ai i ka ʻōlelo o nēia ʻāina a hiki i ka lā i ʻāpono ʻia ai ka ʻōlelo Hawaiʻi ma ke ʻano he ʻōlelo kūhelu, e naue ana nō ka ʻōlelo i mua. Mai ka wā i kūpale ai ke koa wiwoʻole o Maui-a-Kamalalawalu i ka pono o ko kākou ʻōlelo Hawaiʻi ʻana a hiki i ka wā a nā kamaliʻi ʻelua o Lānaʻi i hōʻole ʻia ai ka naʻauao Hawaiʻi kūpono i hoʻopaʻa ʻia e ke Kumukānāwai Hawaiʻi, e holomua ana nō ka ʻōlelo i mua.

E ka makamaka heluhelu, ʻōlelo ʻia e ka mokuʻāina o Hawaiʻi, he kākoʻo lākou i ka ʻōlelo ʻōiwi a kākou. Akā, he kākoʻo maoli anei, ma ke ʻano he ʻōlelo waiwai ʻiʻo ia ? ʻOiai kākou e koikoi mau aku ana i ke koʻikoʻi o ka ʻōlelo Hawaiʻi no ko Hawaiʻi ma nā wahi like ʻole a pau, aia nō lākou e kiʻi ana e koho i ka wā kūpono e puka ai ka ʻōlelo Hawaiʻi a e puka ʻole ai ka ʻōlelo Hawaiʻi. ʻO Pepeluali ka "Mahina ʻŌlelo Hawaiʻi," akā e kaupalena ʻia ma laila? Ma ka makahiki? Āhea ka wā kūpono e puka ai ka ʻōlelo Hawaiʻi, a ma hea kona palena? ʻAʻohe ona palena, ʻeā. Mai ka ʻehu kakahiaka a ka ʻehu ahiahi, e ʻōlelo Hawaiʻi nō hoʻi kākou, o nalowale auaneʻi ka leo kamaʻalua o ka ʻāina. Aia nō a ʻo kākou ke ʻōlelo mau aku kekahi i kekahi, a laila, ola hou nō ka ʻōlelo Hawaiʻi. 

Mai kinohi o ka makahiki iho nei a ka wā a ʻoukou e heluhelu pākahi nei i kēia mau hua ʻōlelo, ke hoʻohanohano ʻia nei kekahi holomua ʻōlelo Hawaiʻi koʻikoʻi. I kēia makahiki nō e piha ai ke kanakolu kūmāmāhā makahiki i kū ai nā kula Pūnana Leo. A ʻoiai maikaʻi kēia kahua, ʻaʻole i pau iki ka hana. He aha lā kai koe? ʻO ka ʻōlelo Hawaiʻi mau ʻana ma waho o nā kula: e lohe ʻia i ka lumi ʻaha hoʻokolokolo, ma ka hale kūʻai, ma ka panakō, a me nā wahi ʻē aʻe o ke kaiāulu nei, i hōʻike ai i ka pono o ka ʻōlelo Hawaiʻi. Akā naʻe, ʻaʻole hana ʻia kēia mau hana me ka ʻole o ka pilikia. ʻIke maka ʻia akula hoʻi ke kūpaʻa a me ka ʻonipaʻa o ke koa ʻōlelo Hawaiʻi, o Kaleikoa Kaʻeo, i kona kū ʻana ma ka hihia ʻaha hoʻokolokolo. Noke naʻe ʻo iala i ka ʻōlelo Hawaiʻi akula ma mua o ka luna kānāwai, i loko no o ka hoʻopaʻi ʻia mai. ʻAne like akula me ke Aliʻi Wahine Keʻelikōlani, ka mea nāna i kū no kona Lāhui Hawaiʻi a no ka ʻōlelo Hawaiʻi hoʻi. Kū lāua me ka wiwo ʻole i mua o kekahi anaina a ma mua hoʻi o kekahi mau ālaina, a hoʻopuka i ka leo ʻōiwi o ka ʻāina. E oʻu mea heluhelu, ʻike nō kākou i ka hana nui o nā mea i aloha mau i ka ʻōlelo makuahine a kākou. A ʻike hoʻi kākou i kekahi ala a lāua e alakaʻi ai i ka poʻe ʻōlelo Hawaiʻi.

ʻO ka mea i kākau ʻia i ke Kumukānāwai Hawaiʻi, ʻo ia nō ka pono e hoʻōla hou ʻia ka ʻōlelo Hawaiʻi. Penei ke kuleana o ka mokuʻāina o Hawaiʻi i kākau ʻia ma ka māhele ʻehā o ke Kumukānāwai Hawaiʻi: “The State shall promote the study of Hawaiian culture, history and language. The State shall provide for a Hawaiian education program consisting of language, culture and history in the public schools. The use of community expertise shall be encouraged as a suitable and essential means in furtherance of the Hawaiian education program.” ʻOiai ʻano laulā kēia ʻōlelo, ʻo ka mea nui, ʻo ia ke kuleana a ka moku ʻāina e hoʻōla hou ai i ka ʻōlelo Hawaiʻi. A i ka Pūnana Leo e kō mau ai kēia kuleana. 

Eia naʻe kekahi loio o ka mokuʻāina ke hōʻole nei i ka waiwai o ia kula. ʻO ka manaʻo o ua loio mokuʻāina nei, ua lawa ke kanalima minuke i kēlā me kēia pule no ke aʻo ʻana o nā keiki i nā mea Hawaiʻi. Koikoi ia loio, ʻaʻole pono nā keiki i ka Pūnana Leo, ʻaʻole nō ia he kuleana a ka mokuʻāina e hoʻokō ai. Ua nīnau kekahi luna kānāwai kiʻekiʻe, inā ʻaʻole kākoʻo ʻia ka Pūnana Leo i mea e hoʻōla hou ai i ka ʻōlelo Hawaiʻi e like me kai hoʻohiki ʻia e ke Kumukānāwai Hawaiʻi, pehea e kākoʻo ai ka mokuʻāina a hoʻokō i kāna Kumukānāwai? ʻAʻole ʻo ia i pane i ka nīnau, ua ʻōlelo wale ʻo ia me ka leo nāwaliwali, “ʻaʻohe kuleana o ka mokuʻāina no ka hoʻolako ʻana i ke kula ʻōlelo Hawaiʻi.” Hiki ke ʻike i ka hoʻokamani a ka mokuʻāina. No laila, ʻoiai e hoʻokamani mau ka mokuʻāina, e mau ana nō kākou i ko kākou hana i ola ai kā kākou ʻōlelo makuahine.

E ka mea heluhelu, inā e ola mau ana kākou ma lalo o ka lani i luna a ma luna o kēia honua nei i lalo o kākou me ka ʻole o kā kākou ʻōlelo makuahine, e ola mau ana kākou ma ke ʻano he malihini, a ma ke ʻano he kanaka ʻōlelo kūwaho. E uē ana nō ko kākou makuahine i ka nele i ka leo Hawaiʻi ʻole. A e uā mai ana ka leo kupa o Hawaiʻi akā e pā ana i kēia leo ka pepeiao kuli o ka lehulehu. Inā nō hoʻi ʻo ka ʻōlelo Hawaiʻi kāu ʻōlelo makuahine, inā aloha nō ʻoe i kou makuahine, e mālama pono iā ia, e kūpale iā ia, a e hoʻōla hou iā ia. ʻO ke aloha nō ia o ke keiki.

© Miki Cook . 2018

© kauluhoi 2017