ka ulu hoi
manoa . kona . o'ahu-a-lua

  Ka Leo o ka Manu Alamea
na Ilikea Afong

Welina mai e ka poe puni mele o Hawaii nei. Ua pii ka hoihoi i loko ou no na mea himeni mai na makahiki i hala aku? Ua hoalaia anei na pepeiao? Ua hoalaia no ko'u i na leo nahenahe i loheia i kela poaono aku nei. I ia po ua hookani pila na mea hookani he nui ma ke kula nui o Hawaii ma Manoa. Oiai aneane pau ke kula, o keia ka aha mele hope loa no keia kau, kai kapaia o Hookani Manoa. Ina ua hele oukou i keia hanana maikai loa, a ua lealea no, aoia! O ka hookani hope loa ma Manoa ka'u hookani punahele e hele aku ai. He hanana ia no na kumu, no na haumana, no na hoa, a no ka ohana kekahi. No'u iho, he mea ia no ka hoona ana i ka loohia i kau iho la iluna o kakou mamuli o ke kula.

O na mea hookani i kipa mai ia kakou, oia no o Robi Kahakalau ame kona mau hoa. Ua hookani pila o Aaron Mahi, Martin Pahinui ame George Kuo, o Weldon Kekauoha, o Chad Takatsugi ame Kama Hopkins. Ua kipa mai la ka ohana Lim mai ka moku o Keawe a o Anakala Ainsley Halemanu ame kona mau hoa kekahi. O Kimo Alama Keaulana, o Jeff Teves a o Paul Kim kekahi i kipa mai la ia kakou. Ua hookani pila nohoi o Wehilani Ching, Nickie Hines, Wainani Kanealii ame Ihilani Miller. Ua hoike mai la nohoi ka papa mele (olelo Hawaii 284) i ka lakou hana i keia kau.

No'u iho, aole kamaaina au me kekahi o ia mau mea hookani pila. O kekahi o lakou, ua kaulana loa i ko lakou wa opio i ka lakou hana aka nae he wa okoa keia a aole maopopo i ka opio o keia wa, owai keia poe. A nolaila, oia ke kumu i makemake ai au e hoike i kekahi mau mea hoihoi e pili ana i kekahi o na mea hookani i helu papa ia maluna ae.

Ua laki hoi au no ka mea, ua hai moolelo mai o Anake Ihilani Miller laua o Anake Nickie Hines, a hoolohe au. He mau wahine loea oluolu laua, me he manu la, hemolele na leo ke lohe aku. O keia mau manu laha ole, piha no ko laua naau i ke aloha no ka poe Hawaii a no na mele Hawaii kekahi. Eia kahi moolelo.

Ua hoomakaia ko Anake Ihilani hookani pila ana i kekahi puulu i kapaia o Menehune Maidens. I ia manawa, he umikumamaha wale no ona makahiki, aka nae, ua hookani pila o ia me kona mau hoa i na hale hulahula. Oiai he mau opio no lakou, ua hoololi na hale hulahula i ka lakou mau lula no Anake ma, i hiki ai ia lakou ke hookani ilaila. O kekahi mau mele kaulana ana i haku ai, oia no o Kuhio Beach ame Pakalana. Ua kaulana no keia mau mele elua i kona wa opio a mau no ko laua kaulana i keia mau la. Wahi ana, hookaniia kana mele o Kuhio Beach ma ka Old Lahaina Luau ma ka mokupuni o Maui. Oiai hoololiia ka hoike a lakou i kekahi mau mahina, ua paa mai la ia mele i ka lakou hoike. Ua kipa aku la o ia i kela me keia ano wahi elike me Kapalakiko, Kina, Iapana a pela aku no ka hookani pila ana. No kanakolukumamalua mau makahiki, he lala no oia no ka Royal Hawaiian Band. A mau no kona himeni a hookani ana me ia hui.

O Anake Nickie, ua hoomakaia kona hookani pila ana i kona makahiki eiwa. He mau manu kupanaha laua, ea? He umikumamakahi mau keiki a kona mau makua, a oia wale no ka mea hookani i kona ohana. No ka mokupuni o Keawe mai oia, a nui kona iini i na mele Hawaii kekahi. Elike me Anake Ihilani, ua kipa aku oia i na wahi like ole no ka hookani pila ana. Nana i hoomaka aku i ka papahana kokua ma ka halepule o St. Matthews i ka makahiki umikumamaiwa kanawalukumamaha. Ua kapaia ia papahana kokua o Kokua Food Basket. Nui kona iini e kokua i ka poe Hawaii a e haawi ia lakou i na mea e pono ai ka noho ana i anei.

Wahi a keia mau manu kamahao, ua maikai loa no ka hookani ma Manoa. I ko laua manao, he mea ia e pono ai no ka hoomanao ana o kakou apau i na mea waiwai a ka poe Hawaii. Wahi a laua, kupono nohoi ka hoomau ana i ia papahana. Aole hiki ke poina ia kakou ka hana maikai a na kupuna ina oia ka hana maamau. Iau i kamailio ai me laua, ua aoia mai la laua e paa ka waha a hoolohe ka pepeiao. He haawina waiwai no ia. Nui ko laua anoi e hai i ko laua moolelo i ike na opio i ka waiwai o keia mau hana.

Lana ka manao o keia wahi mea kakau, na keia moolelo i kanu i kahi hua i loko ou, e ka mea heluhelu, a e ulu ana kela hoihoi ame ka iini e hele a kamaaina me na leo Hawaii makamae o keia aina hiwahiwa. Ilaila no ka waiwai o ke ao ana mai, ma na mele a ma na moolelo i haiia, i himeniia a i hookaniia e lakou. He mea minaminaia ka wai a ka manu alamea.

© 2007 . Ilikea Afong


 
     

Waihona manao

I loaa makou nei



Waihona nupepa