Ka Ulu Hoi 9.3

Hele mai la kekahi mau kanaka a haawi i ko lakou manao i na anaina o nei kula i kekahi mau pule i hala aku. O ko lakou hana, he hana waha vale(1), lohe ole ia na mea a lakou i uwa ai. Ua oupe(2) ko lakou waa o ka noonoo, eia no nae kekahi o ko lakou ike. Wahi a lakou, manao ino ke Akua ia kakou apau loa no ka mea he mau poe hana hewa kakou, nolaila o Kehena(3) ana ko kakou wahi e moe loa ai. Ina pela, aole aloha ke Akua i kela kanaka a moe ana oia me kakou, aohe wahi hoola ia kakou! Tsa! Oiai wau he kanaka hahai ia Iesu, maopopo no au, mai lohe iki i ia mau nahesa.

Ioane: mokuna 3 pauku 16. "No ka mea, ua ALOHA NUI mai ke Akua i ko ke ao nei, nolaila, ua haawi mai oia i Kana Keiki hiwahiwa, i ole e make ka mea manao io iaia, aka, e loaa iaia ke ola mau loa."

Ioane: mokuna 3 pauku 17. "AOLE nohoi i hoouna mai ke Akua i Kana Keiki i ke ao nei, I HOOHEWA AI oia i ko ke ao nei; aka, i ola ai ko ke ao nei ma ona la."

Ioane: mokuna 13 pauku 1. "Mamua o ka ahaaina moliaola, ike iho la o Iesu, ua hiki mai kona manawa e hele aku ai ia i ka Makua mai keia ao aku, i ke ALOHA ana i kona poe ponoi i ke ao nei, ua aloha oia ia lakou a hiki i ka hope."

Roma: mokuna 8 lalani 38-39. "No ka mea, ke manao maopopo nei au, aole e hiki i ka make ame ke ola, aole i na anela ame na alii ame na mea ikaika, aole hoi i na mea o neia wa ame na mea mahope aku, aole hoi i na lunakanawai, aole hoi i ke kiekie ame ka hohonu, aole hoi i kekahi mea e ae i hana ia, ke hookaawale mai ia kakou, mai ke aloha mai o ke Akua, ina no iloko o Kristo Iesu o ko kakou Haku."

Hiki no ke helu ia na wahi apau iloko o ka Baibala e hoike mai, o ke Akua, he iini kona e pili me kakou. Nolaila ina makemake oe e pili ia hai, e manao ino ana oe iaia? Aole paha! Ina noonoo kakou pela i ke Akua, ua kuhi a hewa kakou apau loa.

Maopopo no au, ke oleloia ka inoa o Iesu, he mea maamau no kakou na Hawaii ke pani koke ana i na pepeiao. O ke kumu nui o ia hana, oia hoi ka hale "laa" o ke Akua. Ina ua laa no ka hale pule, ina ua hoikeia he waiwai ka ike o na Kanaka. Aka no nae, ua hele mai la no lakou me ke aloha ole. Hele mai na misioneli me ka paipai ole i ko kakou poe kupuna. Me he mea la, oi aku ke akamai o ko lakou manao mamua o ko kakou. Hoolahaia ke ano o ke Akua me ka noonoo ole i na kanaka e noho nei ma anei.

Kupu mai la he manao iloko o Makua Opukahaia – iaia ma ka aina e – e hoouna mai he mau kanaka misioneli me ka manao e kokua nohoi, eia no nae kakou e ike nei i ka hopena o kona hoomaopopo ole. No ke aha i manao ai oia, e noi i kekahi mau poe e hele mai i ko kakou one hanau? Aole anei oia i ike i ka hoohewaia ana o kona mau Kanaka? Aole paha, aka ua nana pono paha oia i na mea a ke Akua i hoopomaikai ai iaia, ame ke aloha nui o ke Akua ia kakou apau, eia no he Kanaka hahai pono ia Iesu a he Kanaka maopopo i ke aloha palena ole o ke Akua. Makemake hoi oia e ike kona lahui i ia ano aloha.

Nolaila, o ka puolo a Iesu i waiho ai me kakou, oia ke aloha. No kela mau waha vale, ua hoao lakou e hoomakau mai ia kakou me ko lakou hoahewa ana, aka aole paha lakou maopopo i kekahi mea: o keia aina, he aina aloha no, no ka ole o ke aloha e make ana no ka lakou mau olelo.

Eia no au he keiki o ka Hale Laa, he pua i mohala mai i ke alo o na kupuna Kalikiano a he lei no au ma ko lakou poli. Ike no au i na hewa o makou, o ka poe o ka Hale Laa. No makou ka hewa a no Iesu ke aloha pau ole, ina imi hala ia kekahi mau kanaka, o makou no, waiho wale ka puolo o ke aloha me makou, aua no makou i Kona aloha, a o ka "makana" e laha ana imua o oukou e ka ohana, oia ka hoohewa ana i ko kakou mau kupuna, ka papaia ana aole e hoomau i na ike o ko kakou mau kupuna, ame ka manao o makou na kaikuaana. Aka aole pela. Nolaila eia no au me kuu lei kala ia oukou apau loa e waiho nei ma ka paia o ko hale me ka puolo o ko makou Haku o Iesu. Ke Aloha no.

(1) I ka olelo Tonga ka manao nui o vale, oia o "hupo" (he hoopili olelo no "waha wale").

(2) Elua manao o keia hua olelo: 1. ke kuhihewa, 2. kokoke no ka waa e huli.

(3) Oleloia ma ka Baibala, elua wahi e hele ai kakou mahope o ka make, o ka lani kekahi o ka hoi ana no i ka poli o Iesu, a i ole hele malalo, ma Kehena.