Ka Ulu Hoi 9.3

I ka la 14 o Malaki, ua puka mai kekahi kiionioni Kepani, oia hoi, o Honokaa Boy, ma na hale kiionioni ma Iapana. Ua pai holookoa ia ua kiionioni Kepani nei ma Honokaa, kahi a ka poe Kepani i pae mai ai no ka hui mahiko i ke au ia Kalakaua. He kiionioni o Honokaa Boy no kekahi kane opio i pae i Honokaa mai Iapana mai no ka makaikai ana i ka makahiki 1999. I ua kane opio nei e noho ana ma Honokaa, ua umeia oia i ka nani oia wahi ame ka puuwai pumehana o ka poe o laila i piha palena ole me ke aloha. He moolelo keia no loko mai o ka puke i kakauia e Leo Yoshida a he moolelo oiaio hoi ia e pili ana i kona launa ana me ko Honokaa ame kona hana ana ma Honokaa Peoples Theater ma ke ano he limahana.

Oiai o Leo ma Honokaa, ua launa oia me kekahi luahine Kepani, me Beatrice Okamoto. Ua hele a pili loa laua me he mea la he ohana laua. I kela me keia la, ua kuke o Beatrice i ka aina ahiahi na Leo, a walea i ke kamailio e pili ana ia Iapana, Hawaii ame na mea maa mau o ke ola. Ia laua i ke kukahekahe ana, ua ao mai o Leo i ka ike o ka poe Kepani e noho ana ma Honokaa ame ko lakou aloha pumehana.

Ma hope o ka hoi ana aku o Leo i Iapana, ua kakau oia i kekahi puke e pili ana i kona noho ana ma Honokaa me ka ike i loaa iaia ma o ka launa pu ana me ka poe olaila. Ua ulu ka iini o kekahi hui kiionioni Kepani, o Nippon Cinema, e hana i kiionioni no keia moolelo kamahoi a Leo Yoshida. Me ke kokua o ko Honokaa, ua hookoia keia iini ma o ke kiionioni kamahao o Honokaa Boy.

I loa no a puka mai ke kiionioni o Honokaa Boy, hele aku la ka poe Kepani he nui e nana i ia kiionioni kamahao. O ka mea i hoopakela i ka nani o keia kiionioni, oia no ka puuwai hamama o ko Honokaa i ka malihini opio, ia Leo. Na ka luahine Kepani, na Beatrice i paheahea ia Leo. He meaai a he hale ko Leo i kona kipa ana i ka aina malihini ona. Eia hoi, ua hai moolelo ko Honokaa ia Leo e pili ana i ko lakou ola ma Honokaa i kela me keia la. I ka nana ana aku i keia pilina mawaena o Leo ame ko Honokaa, upu ae la ka manao o ka poe Kepani e ao mai e pili ana i ka poe Kepani i pae mai i Honokaa no ka hana ana i hui mahiko. No ka poe Kepani o keia mau la, he mea ano nui ka hoomaopopo ana i ka moomeheu o ka poe mahiko no Iapana mai no ka mea he ohana lakou. Aole i maopopo ka halia o ua mau poe mahiko nei ame ka lakou hana oolea ma Honokaa i ka hapanui o ka poe Kepani o ke au nei. O Honokaa Boy kekahi kumu e kupu mai ai ka hoihoi o ka poe Kepani o ke au nei i ka noii ana i ko lakou ohana i hana no ka hui mahiko ma Hawaii nei.

Eia ka ike e hoonuiia nei maloko o ka naau o ka poe Kepani. Ua pae mai ka poe Kepani mua i Honokaa i limahana no ka hui mahiko i ka makahiki 1868. Ma o ka hana ana, ua ao mai ua mau poe Kepani nei i na haawina ano nui, e laa ke ahonui i ka hana oolea, ka hoihi ana i na kupuna, ke kakoo ana i ka ohana ame na hoa launa kekahi i kekahi, ame ka noonoo pono ana i na hanauna hou aku. He oolea ka hana, aka hana pu a kakoo lakou kekahi i kekahi. I ko lakou manawa inea, kokua aku a kokua mai lakou me ke aloha pumehana. Eia hoi, ua kaana aku a kaana mai lakou i ka lakou mau meaai. Ike aku a ike mai, kokua aku a kokua mai, pela no ka nohona o ka poe Kepani i ke kaiaulu mahiko. Eia nae, poina keia haawina waiwai i ka poe Kepani o keia mau la. He minamina maoli no ia.

Nolaila, he haawina ko keia wahi kiionioni o Honokaa Boy no na mamo a ua mau poe mahiko nei i mea e ulu ai ko lakou hoihoi i ka noii ana i ka ike o ko lakou mau kupuna ma Hawaii nei. Pela no i hoopukaia'i ka waiwai o ke kiionioni o Honokaa Boy me ka manaolana e haiia ka moolelo no Leo Yoshida ma ke ano he haawina e ao mai ai ka poe Kepani i ka moomeheu o ko lakou mau kupuna ma Hawaii nei.