Ka Ulu Hoi 9.3

I keia wa, nunui na oihana e hiki ole ke holomua mamuli o keia au nele. I ka wa mamua, eia kekahi manao maa mau: aole no ka waiwai mai ka hauoli. Aka nae, hoololiia no keia manao mamuli o ka popilikia. O ke kala ka kakou mea e hoikaika ai i mea e ola mau ai. Minamina kakou i ka olelo ana e o ka waiwai ka pono e hauoli ai kanaka. Ina loaa ke kala, loaa ka hale, loaa ka mea ai, loaa ka lole, a o keia na pono o ka nohona hauoli. Hoomanao kakou i ka paani papa o LIFE? He oiaio no ko laila. O ka pohuhope ka loaa ana o ke kala he nui i mea e uku ai no na mea pono. Ina aole lawa kau kala, aole hiki ke holomua a eo oe. E piholo ana oe i ka paani o LIFE!

He olelo noeau pokole keia nona ka manao nui: "He liilii ka ukulele, naue nae kino nui." Nau no keia ina he mea oihana oe, a he mea hana oe, a i ole he manao kou aka pauaho oe i ka hana ame ka holomua mamuli o ke au nele nei. Mai manao iho oe me ke ano pauaho a mauleule! E hoao no! E hooko i ka iini o kou puuwai. Eia he moolelo kumu alakai no oukou.

He moolelo ia no Kuluwailiimokihana Harumi (Rodrigues) Furuta. O Lii kona inoa kapakapa. He hale pa'i ko ua wahine eleu nei ma 920 i ke alanui o Kilani ma Wahiawa. O Island Athletes ka inoa o ka oihana. Ua hoomaka o Lii i kana oihana pai i ke kauwela o 2005 mawaho o kona home ma Mililani. I Pepeluali 2007, pomaikaiia oia i ka loaa ana mai o kahi keena liilii ma Wahiawa. I ka manawa i loaa ai ke keena iaia, hui aku la kona kaikaina, o Kamaile, e kokua iaia i ka hana keena. Ua hana hookahi o Lii a i ia manawa. I keia manawa, aia mau no ke pai ana iloko o kona wahi hooku kaa ma kona hale, a hana o Kamaile ma Wahiawa. O laua wale no na mea e hooholo i ka oihana!

Wahi a Lii, hoikeia ma ka inoa oihana, o Island Athletes hoi, ka manao nui ame kona pahuhopu. Nui kona aloha no na ano alapa like ole no na kulana makahiki apau. I kona manao, he lahui kuikawa na alapa. He mea maamau ke ano o lakou no ka mea hoike lakou i ka paulele, ka iini, ka hoihi, ame ka haaheo. Wahi ana, e kokua aku ana kana oihana i na hui alapa, na hui hana, ame na kanaka e hoopuka i ka lakou olelo ponoi. Aia he iini iloko o Lii e kokua aku i keia mau lahui. Elua ona pahuhopu nui. O ka mua, e kakoo aku a e kokua i na alapa, na moho o Hawaii i ka hookuku ana apuni ka honua. O ka lua, e pai i na olelo e hoouna i ke aloha mai Hawaii aku.

Mamuli o kona hana miki a hana eleu ana, e holomua ana no oia. Ua pono kana oihana. Mai kana manawa i hoomaka ai aole oia i hooku i ka holomua ana i ka hana miki. Holomua kupaa oia mai ia wa i hoomaka ai a i ka wa nei me ka eleu. Aia kekahi mau alai i ke ala aka nae aole ia he kumu e lilo ai i ka pilikia. E wehe i na pilikia a holomua no oia. I keia manawa, he manao kona e hoonui i kona oihana. E imi ana oia i kekahi keena nui i keia makahiki nei. Pomaikaiia oia i ka hana miki. Nui na kanaka e kuai mau i kana e pai ai. I na makahiki apau, kapiliia na pilikana o Lii laua o kona mau hoa. Mamuli o kana hana oi loa. Hoihoi no kela me keia makahiki nona.

"He liilii ka ukulele, naue nae kino nui." O Lii ka ukulele liilii aka hoonaueia nae ka lehulehu e ia. Nui kona iini e holomua no aila, e holomua ana no oia. E ka mea heluhelu, mai noonoo aole hiki ke ko kau pahuhopu. E hoolana i ka manao, a holo aku i ke ala kupono a hookoia kou makemake. O Island Athletes kekahi oihana e holomua ana i keia wa iloko no o ka popilikia o ke ao nei. Malia paha, ano paakiki ka hoomaka ana aka me ka hiu ana, hiki ke hanaia na mea like ole.

Auhea oukou e na alapa, na ano hui like ole, ame na mea haaheo e makemake e hoike i kou akamai, iini, a hoihi, ame ko oukou haaheo. No oukou no ua mea nei, o Island Athletes. Paiia na ano mea like ole e Island Athletes. Eia na mea i paiia: na kii like ole, na hoailona ame na kilepalepa, na pepili like ole, na makeneki no kou kaa, na kope waihooluu ame na kope eleele, ame na kaleka oihana. Kokua aku, kokua mai, a holomua kakou apau i keia wa nele.