Ka Ulu Hoi 9.3

Aloha mai e na hoa makamaka mai ka la hiki a ka la kau, eia ke kanaenae a ka mea kakau, he ano lahalaha keia. Eo mai e na kanaka e kukulu hou i ka nohona o ko kakou mau kupuna, e na hoa e hula i ka hula, e oli i ke oli, e hoomoa i ka mea ai, e hoopaepae i ka loi, e na hoa e ola i ka nohona Hawaii, eo! Mahalo nohoi oukou e na hoa e hahai i ke ala i waihoia e na kupuna he mea koikoi a he kuleana keia no ka lahui.

Aka he mea noii iki keia. Pehea hoi e na kanaka e hahai ole i ia mau hana? Ina e kuko ana paha i ke kokua ana i ka noho ana o ko Hawaii, e hoao i keia mea: "E hume i ka malo," a, i kela me keia Poakahi, e komo kakou i ka lole Hawaii. Ua kohoia ka Poakahi, he mea maalahi no ka hoomaopopo ana no ka mea, e kapaia paha ka la o "Malo Monday." Hookahi la keia no ke komo ana aka, ia kakou no a hookamaaina ai i ke komo ana i ia ano lole, malia, o komo kakou i kela me keia la.

He au hou keia, nolaila, aia he mau lole like ole, e laa ka pulu, ke kilika, ame ia lole aku ia lole aku, a hiki no ia kakou ke komo i ka lole e makemake ai. Pela pu no me ka lole e humuhumuia ai ka lole Hawaii. O ka lole palupalu nohoi ka mea a'u e koho ai no ka humuhumu ana i kuu malo. Oiai kakou e koho ana i ka lole a kakou e humuhumu ai, he aha ka oukou mea punahele no ke komo ana?

Hilahila paha kekahi mau kanaka, a oia paha ke kumu o ka hume ole i ka malo. Mai hopohopo; loaa no ka lole wawae! E hume i ka malo, alaila komo i ka lole wawae, o ka mea koikoi au e hoike aku nei, e komo i ka lole Hawaii! Eia kekahi laana, i ke hume ana i ka malo a he anuanu o waho, aohe ou lukaluka? E komo pu i ka lole wawae!

O na lole o kakou e komo ai i kela me keia la, he mea a na mikionali i lawe mai ai i ka wa kahiko no ka mea, i ko lakou manao, he mea ino ke komo ana i ka lole Hawaii, a aole lakou ae i ka hele wale o kakou i ka lole Hawaii. Aka, maopopo no ia kakou, hewa ko lakou manao. Ina e hele ka poe Haamoa i o ianei i ko lakou lole Haamoa, hiki ia kakou, i ka poe Hawaii, ke komo i ko kakou mau lole Hawaii a hele elike me ko kakou makemake me ka ole o keia kaumaha, o ka manao mikionali.

E na hoa e hahai i ke ala i waihoia e na hulu kupuna o kakou, he wahi mahalo no keia ia oukou. Ia kakou e hula ai, komo i ka lole Hawaii. Ia kakou e mahina ai ai, komo i ka lole Hawaii. Ia kakou e lawaia ai, komo i ka lole Hawaii. Ia kakou ma ka hana hoohanohano, komo i ka lole Hawaii. Mahalo no ke komo ana. Aka nae, e na kanaka e makemake, aole ua mau hana nei o ka manawa hookahi no ke komo ana. Aia no he mau manawa kupono no ke komo ana i ka malo kea a i ole ke kihei ponoi, aka mawaho o keia mau manawa, e aho kakou e lawalawa i ka lukaluka, e hume i ka malo, e kakua i ka pa-u, e hookala i ka ihe.

Mahalo nohoi oukou e na hoa makamaka heluhelu i keia nupepa, oia hoi o Ka Ulu Hoi. Na oukou no e kukulu i keia mau moolelo, o ka mea kakau ka mea nana e kakau i ko oukou mau moolelo ponoi.