E aha ʻia ana ʻo Mauna Kea?
na Kainoa Tengan

IMG_3192

‘Auhea ‘oukou, e ka po‘e Hawai‘i e mālama i ka ‘ōlelo makuahine a me ke aloha no ka ‘āina. I ka ‘aha aupuni ma ka lā 21 o ‘Ianuali, ha‘i maila ke kia‘āina o Hawai‘i nei, ‘o Neil Abercrombie, i nā pahuhopu no kēia makahiki. Ua wehewehe ‘o ia i ‘umikūmālua mau pahuhopu. A ‘o kekahi o nā pahuhopu, pili i ke po‘oinoa o kēia mo‘olelo nei, ‘o ia nō ka mauna a Wākea. Mea ʻia maila, makemake ‘o ia e holomua i ka hana ma laila, ‘o ia ho‘i ke kūkulu ‘ia ‘ana o ka ‘ohe nānā i kapa ‘ia ‘o ka “Thirty Meter Telescope” (TMT). Ua ‘ōlelo ‘ia, ‘o ka TMT ka mea e hō‘oko‘a i ke aupuni o Hawai‘i, a ‘o Hawai‘i nei ke po‘okela o nā ‘āina ma kēia ‘epekema ‘ohe nānā.

Ua koho ‘ia ‘o Mauna Kea no ke kahua o ka TMT i ka makahiki 2009. Makemake ‘ia kahi ‘o Mauna a Wākea no ke akāka o ka lani. Li‘ili‘i nā ao i ka ‘ike ‘ana, a ‘a‘ole nui nā kukui e ho‘opilikia i ka hana o nā ‘ohe nānā. 

Ma hope, ua kū‘ē nō kekahi o ka po‘e Hawai‘i, ka po‘e mālama ‘āina, a me kekahi mau hui ‘ē a‘e i ke kūkulu ‘ia ‘ana o ka TMT. He mau mana‘o ma hope o ke kū‘ē ‘ana. ‘O kekahi ka mana‘o o ka po‘e Hawai‘i, a penei ia: he kupuna, he ‘ohana nō ‘o Wākea no ka po‘e Hawai‘i. No laila, he wahi la‘a ‘o Mauna a Wākea. ‘O kekahi mana‘o ‘ē a‘e ka mea o ka po‘e mālama ‘āina, a penei nō: nui ka pohō o ka ‘āina ma laila ma muli o ke kūkulu ‘ia ‘ana a me ka mālama ‘ia ‘ana o nā ‘ohe nānā a me nā hale i kahi kokoke.

He nui launa ‘ole nā kānaka i pūlima i kekahi palapala hoʻopiʻi i mea e pau ai kēia hana. Hele akula ka paio i ka ‘aha loio. Akā na‘e, mau ke kūkulu ‘ia ‘ana, mau ka ho‘olohe ‘ole ‘ia ‘ana o ka leo o ka po‘e Hawai‘i. A hiki i kēia lā, ke pūlima nei kekahi mau kānaka i kekahi palapala hoʻopiʻi ma ka pūnaewele.

I ka makahiki 2013, ua ho‘ā‘o ke kulanui o Hawai‘i e hoʻōla hou i kā lākou mau palapala ho‘olimalima no Mauna Kea. Ua ho‘omaka ‘ia ko lākou ho‘olimalima ‘ana ma ka makahiki 1968, a e pau ana ma kahi o ka makahiki 2034. Akā, i ka mahina ‘o Kēkēmapa, ua hoʻopaneʻe ua kula nui nei i ka hoʻōla hou ‘ana i ka palapala ho‘olimalima, no ka mea, makemake lākou i kekahi kālailai ‘ia ‘ana o ka hopena o ka ‘āina, ma hope o nā hana like ‘ole i hana ‘ia ma laila. E uku ana nō ua kula nei no kēia kālailai ‘ana, no ka mea, ‘a‘ole lākou makemake i ka pilikia ma hope o ka hoʻōla hou i ka ho‘olimalima ma laila.

He ‘ekolu paha makahiki ka lō‘ihi o kēia kālailai ‘ana, a e lilo ho‘okahi miliona kālā no ka hana. Akā na‘e, e holomua ana ua kula nui nei i ka ‘i‘ini e ho‘omaka i ke kūkulu ‘ana i ka TMT, e like me ka ‘ōlelo a Abercrombie. E ho‘omaka ana ke kūkulu ‘ana i ka mahina ‘o ‘Apelila i kēia makahiki. A, e pau ana ke kūkulu i ka makahiki 2022.

I loko o ‘elua wale nō mahina, e ho‘omaka ‘ia ke kūkulu ‘ia ‘ana o kēia ‘ohe nānā nui hou, ‘o ia ka Thirty Meter Telescope. He minamina nō.

No laila, e nīnau au, ka mea kākau, iā ‘oukou a pau e heluhelu nei i kēia mo‘olelo: Inā hāpai kākou i kēia mana‘o kū‘ē i ke kūkulu ‘ana i ka ‘ohe nānā, he aha kā kākou hana ma kēia manawa? Pehea e hoʻopau ai i ke kūkulu ‘ana?

Ua ho‘ā‘o kākou e koi i ke aupuni e ho‘opau i ka hana ma o ka palapala hoʻopiʻi, a ua kū‘ē paha kekahi po‘e ma kekahi mau ‘ano like ‘ole: ma ka ‘aha loio, ma ka hālāwai ho‘olohe, a pēlā aku. Akā, ua mau nō ke kāko‘o ‘ana o ke aupuni i ka ‘ohe nānā.

Ua mau nō ke kū‘ē ‘ana a me ke kali ‘ana no ‘ehā a ‘oi makahiki. ‘O kēia paha ka manawa hope loa e hana ai kākou e hō‘ike i ko kākou mana‘o e pili ana i kēia ‘āina la‘a ‘o Mauna a Wākea. He aha kā kākou hana i kēia manawa hope o ke kū‘ē ‘ana?

No laila, inā he mana‘o kou, no ke kū‘ē ‘ana i kēia hana, e leka uila iā mākou po‘e kākau o kēia nūpepa nei. A e nīnau hou au iā ‘oukou a pau: he aha kāu hana ma kēia manawa? E kūlia i ka nuʻu.

© Kainoa Tengan . 2014

© kauluhoi 2017