Ka ʻIke “Hou” a Kahiko
na Kepoʻo Keliʻipaʻakaua

E nā makamaka mai Lononuiākea a hiki i Kamāwaelualani, he aloha nō kēia no kākou. He mau mea i kūkulu ʻia ai ko kākou kahua moʻomeheu. Ua lohe pinepine ka hapanui i nā moʻolelo, a ua heluhelu ʻia nā puke a nā kūpuna i kākau ai, akā ʻaʻole nō lawa ko ka lāhui ʻike i ia mea. Ma loko iho nō o nā nūpepa kahiko e noho ana nā moʻolelo kahiko a me nā kāʻao, a ke kali nei lākou i ko kākou kipa ʻana aku iā lākou i mea e kamaʻilio ai.

Kamaʻāina nō kākou i kēlā kaikaina kupanaha o Pele i hiʻi ʻia i ka poli, ʻike kākou i ke kumu o ka holo mālie ʻana o ka Lā, a maopopo ʻia ka hana o ka puaʻa kolohe o Kaliuwaʻa. Kaulana nō ia mau meʻe ma kēia pae ʻāina akā he mau hoa nō hoʻi ko kēia hanauna i launa mua ʻole ai. E hoʻi hou kākou i Kūaihelani kahi i hānau ʻia ai ʻo Kahihikuaokalani, ke Aliʻi laʻa e kapa ʻia nei ʻo Kahānaiakeakua a mālama ʻia e nā ʻeʻepa o Waolani. ʻAʻole paha kākou kamaʻāina iā ia a me kona makuakāne weliweli ʻo Kūahailo. Ke kali nei nō lāua ma ka ʻeleʻele a me ke keʻokeʻo o nā nūpepa a nā kūpuna i paʻi ai, ʻo ke kipa wale nō koe.

ʻAʻole paha maopopo ka ʻōlelo Hawaiʻi i ka hapanui o nā makamaka, a no laila hiki ʻole paha iā lākou ke kipa i ua mau hoa nei i hoʻolauna ʻia ma luna. Akā maopopo nō iā ʻoe kēia mau hua ʻōlelo ʻeā? Nou paha ke kuleana e kipa aku a unuhi i ia mau moʻolelo i mea e kōkua ai i ka lehulehu. Ma kēia hana nō he mau ʻike. 

Na kākou poʻe e hiki ke maopopo ka lelo Makuahine, e ʻimi i nā mea i ʻike ʻole ʻia e kēia hanauna a e ʻohiʻohi i ia mau manaʻo i mea e hoʻoulu ai i nā waiwai o ko kākou waihona moʻomeheu. E heluhelu i ka manaʻo kumu a e hoʻomaopopo i kēlā manaʻo i loko iho o ka naʻau i mea e wehewehe aku ai i nā makamaka e makemake e mohala aʻe i ka ʻike kupuna. E hana me ka makaʻala a e mālama i ka manaʻo kupuna. He mea nui nō ka hoʻomau ʻana o ka manaʻo nui i hoʻopuka ʻia e nā kūpuna. I ka wehewehe ʻana i ia manaʻo, no kākou ke kuleana e hoʻokahe aku i ka leo o ka poʻe kahiko. He kuleana nui paha kēia, akā na kākou āpau nō e ʻai i ka hua e kupu ma ka hopena o ia hana nui.

ʻAʻole paha ʻokoʻa kēia hana a me ka ʻeli ʻana o nā mahiʻai i nā ʻauwai i kēia wā a kākou e ola ana. ʻAʻole nō ka hapanui o ia mau ʻauwai he ʻauwai hou; ua ʻeli mua ʻia e ka poʻe kahiko a piha ka ʻauwai i ka lepo ma ka hala ʻana o nā makahiki he nui. ʻEli hou wale nō kākou i ia mau ʻauwai kahiko a laila holo hou ka wai i hānai i ka ʻai a nā kūpuna i mahi ai. 

Eia ke ʻano o kā kākou hana. Ua kākau mua ʻia nō he mau moʻolelo o nā kūpuna a na kākou ke kuleana e ʻimi i ko lākou manaʻo a e wehewehe mai. He mau hana kā kākou i ka ʻeli ʻana no ua ʻike nei. Akā inā pau ka ʻauwai i ka ʻeli ʻia, hiki nō i ka wai kuhikuhi o ka ʻike kahiko ke kahe mai.

© Kepoʻo Keliʻipaʻakaua . 2014

© kauluhoi 2017