Ka Maka o ka Heʻenalu
na Ikaika Gante

ʻAnoʻai me ke aloha e nā kama hele kai o ka pae ʻāina ʻo Hawaiʻi. ʻAuhea ʻoukou e nā heʻenalu, nā kaha nalu o kēia au. Ua piʻi hoʻi ke kai a ke piha mai nei nā kūlana nalu i nā heʻenalu like ʻole. Ke ulu nei nō ka hoi ma loko o ka lehulehu e komo i ka heʻenalu ma muli o kēia mīkini paʻi kiʻi i kapa ʻia ka Gopro, akā pehea e loli ai ka heʻenalu ʻana a me ko kākou hoʻomaopopo ʻana i ke kai ma muli o kēia mīkini liʻiliʻi? 

G0021569

Ua kaulana ka pahu paʻi kiʻi Gopro i kona hiki ke paʻi wikiō ma nā wahi like ʻole. ʻAʻahu nā heʻenalu i kēia mīkini i mea e loaʻa ai kahi wikiō a i ʻole kahi kiʻi maikaʻi loa. Ua ʻaʻahu hoʻi ʻo Kelly Slater i kēia mīkini a hoʻopaʻa i wikiō i ka manawa like āna e heʻe ai ma luna o ka nalu. Me he ʻopihi la, ua noho paʻa ka Gopro ma kona papa heʻenalu. Inā hāʻule ʻo ia ʻaʻole lilo ka mīkini i ke kai, ʻo ka noho paʻa mau o ua pahu nei ma kahi like. 

I kēia mau lā hoʻouka pinepine ʻia nā kiʻi o nā nalu i paʻi ʻia me ka Gopro ma nā wahi like ʻole o ka pūnaewele puni honua, a ke ulu nei ka hoi ma loko o nā ʻōpio e komo i ke kai a ʻike i kona nani. Maikaʻi ka hōʻeuʻeu ʻana i nā ʻōpio e heʻenalu. E huli kākou i nā kūpuna a ʻike i ko lākou komo ʻana i ke kai no ka heʻenalu ʻana a no ka luana ʻana. Ke hōʻike ʻia nei ka nani o ke kai a me ka ʻāīna ma loko o nā kiʻi i paʻi ʻia e ka Gopro, a he mea ia e paipai hoʻi i ke aloha ʻana i ka ʻāina. Ke ʻike hoʻi nā poʻe i ka nani o ia mau wahi, e mālama paha lākou. ʻIke hoʻi nā poʻe i nā mea i ʻike pinepine ʻole ʻia e like me ka nani o Kāneʻohe mai ka welelau o Haʻikū, a i ʻole ka nani o ke kai ma lalo o ka ʻili kai. ʻO ka nalu hoʻi, he mea i paʻi kiʻi pinepine ʻia no kona nani a no kona kū ʻana he hōʻailona no Hawaiʻi nei. Ma ke kai, ma nā kula, ma ke kuahiwi, a pēlā wale aku.

I ka wā ma mua ʻaʻole nui nā poʻe e paʻi kiʻi ana i nā nalu ma kai akā i kēia mau lā hiki ʻike ʻia nā kānaka he nui me kēia pahu e paʻi kiʻi ana me ka manaʻo e loaʻa ana kekahi kiʻi maikaʻi e like me ka loea paʻi kiʻi ʻo Clark Little. Inā he hālona kēia mea paʻi kiʻi no kai, kupu maila he pilikia. He mea e uluhua mau ai nā kamaʻāina, e piʻi ai ke kai ma loko o nā heʻenalu ʻoiai he ālai mau ko ka malihini iā lākou. ʻO ka mea nui ka hōʻihi ʻana i kahi e heʻenalu ai a me nā kupa o ia wahi. ʻOiai hōʻeuʻeu mai kēia mīkini i nā poʻe like ʻole e aʻa i ka heʻenalu, ka piʻi mauna, ka holo paikikala, a pēlā aku, e akahele inā ʻaʻole i mākaukau i kēia mau ʻano hana. No laila e makaʻala a e hōʻihi.

I maikaʻi a mākaukau hoʻi ke kanaka nona ka Gopro e paʻi kiʻi maikaʻi ana ʻo ia. Akamai pū nō hoʻi ʻo ia i nā  ʻano like ʻole o ke kai. He keu a ka uʻi nā kiʻi i paʻi ʻia me ka Gopro, me he mea lā ua pena maoli ʻia e kahi mea pena kiʻi. I kēia au ke hoʻohana ʻia nei kēia mīkini no ke paʻi ʻana i nā kiʻi nani loa no ke kūʻai ʻana aku i ka lehulehu. Aia he mau kānaka Hawaiʻi e paʻi kiʻi nei i kā lākou hana ma kai a uʻi hoʻi ka loaʻa. He mea hōʻeu maila ke nānā aku. ʻO kekahi mea i maikaʻi ai kēia pahu liʻiliʻi ʻo ia ka moākaaka o ke kiʻi. He mea ia e kōkua i nā mea heʻenalu.

G0210549

He mea hou nō hoʻi ka hoʻopaʻa ʻana i nā wikio o nā hoʻokūkū heʻenalu i kēia mau lā. ʻO nā wikiō i hoʻopaʻa ʻia, hiki ke hoʻolohi ʻia i mea e nānā ai i nā hemahema. He mea kēia e holomua ai ko kākou kuaʻanaʻike o ka heʻenalu ʻana. Ke ʻaʻahu kākou i kēia ʻano mīkini hiki ke ʻike i nā hemahema o ko kākou heʻenalu ʻana. Nānā pono ʻia nā hemahema a hoʻoponopono ʻia ma hope. He kōkua kēia mīkini i nā ʻālapa heʻenalu no ka hoʻomaikaʻi ʻana i kā lākou heʻenalu ʻana a me ke kaha ʻana. I ka wā e hiki mai ana e nui aʻe ana ka maikaʻi o nā heʻenalu ma muli o ka Gopro. 

Inā ʻo kēia pahu ka mea e paipai aku i ka lehulehu e holoholo a mālama i ke kai, e ulu hou ana kēia noʻonoʻo mālama ʻāina i loko o nā kānaka like ʻole. I ka wā e hiki mai ana e holomua nui ana ka heʻenalu a me ka mālama ʻana i nā mea e ola ana ma kai a ma ka ʻāina. Inā ʻike ka lehulehu i ka nani maoli o kēia ʻāina e mālama hoʻi ana ka lehulehu i ka mea i aloha ʻia. Ma muli o kēia mīkini liʻiliʻi hiki iā kākou ke ʻike i ka nani o kō kākou ʻāina, mai kekahi ʻikena ʻokoʻa. E mālama kākou i kēia hana leʻaleʻa a nā kūpuna, a e heʻenalu kākou!

© Ikaika Gante . 2014

© kauluhoi 2017