Ke Kokuli Keleawe
na Mahiʻai Dochin

Kaulana nō ʻo Nelson Mandela a puni ka honua i kona kūʻē ʻana i ke aupuni o ʻApelika Hema i mālama ʻole i nā pono sivila o nā kānaka a pau loa o ko lākou lāhui. Ua lilo ʻo Nelson Mandela, ʻo ia ka pelekikena pāʻele mua loa o ʻApelika Hema, a ua ʻoi aʻe ke kaulike o nā kānaka o ua ʻāina lā ma lalo o kona noho aupuni ʻana.  

Ma hope o ko Mandela hala ʻana, ua kālai ʻia kekahi kiʻi ona e Andre Prinsloo lāua ʻo Ruhan Janse van Vuuren. He kanakolu kapuaʻi ka nui o ke kiʻi o Mandela, akā ʻo ka mea keu a ka pūʻiwa, ʻo ia ka lāpaki keleawe i loko o ka pepeiao o ke kiʻi. ʻAe, he lāpaki nō.  

Liʻiliʻi loa ka lāpaki, a ma muli o kona liʻiliʻi, ʻaʻole ʻo ia i ike ʻia e nā limahana aupuni i ke kiʻi e kūkulu ʻia ʻana. Eia hoʻi, ʻaʻole hiki ke ʻike ʻia ka lāpaki inā e kū ana ma lalo a e nānā ana i luna. Aia nō a loaʻa ka paʻa ʻohenānā, a kū hoʻi ma kahi kiʻekiʻe, hiki ke ʻike ʻia ka lāpaki e noho ana i loko o ka pepeiao o ke kiʻi. 

Ua nīnauele ʻia nā kālai ʻelua, a wahi a lāua, ua hoʻokomo ʻia ka lāpaki no ka mea ʻaʻole i ʻae ʻia kā lāua pūlima ʻana i ke kiʻi. Na ke aupuni i hōʻole. E makemake ana nā kālai e pūlima i ko lāua mau inoa ma ka lole wāwae o ke kiʻi, a hōʻole ʻia, hoʻokomo akula lāua i ka lāpaki keleawe i loko o ka pepeiao o ke kiʻi. Mea mai nā kānaka ʻelua, ʻo ka huaʻōlelo no ka lāpaki ma ka ʻōlelo Afrikaans, ʻo hass ia. ʻO hass nō hoʻi kā lākou huaʻōlelo no ka hana wikiwiki ʻana, a he hōʻailona ka lāpaki no ka pono e hana ʻia ke kiʻi me ka wikiwiki loa. Ua make ʻo Mandela ma ka lā 5 o Kēkēmapa, a hōʻike ʻia ke kiʻi ma ka lā 16 o ia mahina like.   

I koʻu manaʻo, ʻaʻohe hōʻihi o ka hana a nā kālai ʻelua no Nelson Mandela a ʻaʻole paha maopopo iā lāua ka nui o kā Mandela hana. Ua paʻakikī a nui loa ka hana a Mandela no kona lāhui, a ua paʻa ʻo ia i ka hale paʻahao no iwakāluakūmāhiku makahiki ma muli o kāna kūʻē ʻana. Ke namunamu nei ʻo Andre Prinsloo a me Johan Janse van Vuuren no ko lāua hana wikiwiki ʻana i loko o ʻumikūmamāono lā. ʻO ia wale nō. Hoʻokeʻamaka a hoʻokano ka hana a kēlā mau poʻo ʻōpae ʻelua.  

E ko Hawaiʻi, e noʻonoʻo i ka hopena inā i hoʻokomo ʻia kekahi lāpaki keleawe i loko o ka pepeiao o ke kiʻi o Kamehameha. E hū aʻe ka inaina o ka poʻe Hawaiʻi a e paʻa paha ke kanaka nāna i hana i ka paʻahao.

Ua mihi ʻia aku e nā kālai kiʻi ka ʻohana o Mandela a me ke aupuni o ʻApelika Hema. E wehe ʻia ana ka lāpaki me ka wikiwiki i hiki. Ua mea mai ka waha ʻōlelo o ke keʻena o ka hana noʻeau o ʻApelika Hema, ʻo ia hoi ʻo Mogomotsi Mogodiri, penei: “ʻAʻole mākou e noʻonoʻo ana he mea kūpono (ka lāpaki), no ka mea ʻaʻole i loaʻa kekahi lāpaki ma kona (ko Nelson Mandela) pepeiao.” He lamakū kēia o ka naʻauao.

© Mahiʻai Dochin . 2014

(mai www.theguardian.com nā kiʻi o luna)

© kauluhoi 2017