Kūkulu Lāhui: Ke Olakino ma mua o ka Waiwai
na Hāmiha Arquette

Maikaʻi wale nō ʻo Kauai
Hemolele wale i ka mālie
Kuahiwi nani Waiʻaleʻale
Lei ana i ka mokihana

He mele kēia i haku ʻia e Caesar Kapaʻakea a ua wehewehe hemolele nō ia i ka mokupuni ʻo Kauaʻi o Manokalanipō. He moku nani ʻo Kauaʻi nona ka ʻāina laʻa, nā kuahiwi uluwehi, a me ke kai ʻoluʻolu. Akā, aia he pilikia nui ma laila ma muli o ka noho ʻoihana ʻana mai o nā hui i pili me ka ʻoiʻenehana biotech, no laila, ke kūʻē nei ko Kauaʻi no ko lākou pono.  

ʻO DuPont Pioneer kekahi o nā hui biotech e noho ana ma ka mokupuni ʻo Kauaʻi, me ka ʻōlelo ua maikaʻi ka ʻāina no ka mahi i kēlā me kēia kau. Akā, ʻo nā kamaʻāina o Kauaʻi, manaʻo paha lākou ʻaʻole kēlā ʻo ke kumu maoli i koho ʻia ai ko lākou ʻāina. Maliʻa paha ʻo kekahi kumu o ka noho ʻana o Pioneer ma Waimea, no ka mea, manaʻo ʻia he nui pūmaiʻa wale nō ko laila, a he hui kūʻē i hiki iā lākou ke kahina. Na kēia ʻano hui i lawe mai i nā mea ʻino i Kauaʻi, e laʻa me nā Genetically Modified Organisms, a me nā lāʻau make haipilikia nō hoʻi. He pilikia kēia a he kumumanaʻo nui o ka piʻipiʻi ʻōlelo ma ko kākou mau ʻāina e noho nei. Nui nā makahiki i hala ma mua o ka lohe ʻia ʻana o ka leo o kānaka. Ma ka mokupuni ʻo Kauaʻi, nui nā pilikia ma muli o nā hui biotech. Eia nā hui: ʻo Dow, ʻo DuPont Pioneer, a ʻo Syngenta. He pilikia nui kēia mau hui, ʻoiai ʻaʻohe o lākou kuleana no ka poʻe a i ole ke ola kino o ka poʻe; eia ka laʻana i waiho ʻia maila e DuPont Pioneer.  

Aia ʻo Pioneer ke noho nei i Waimea ma ka mokupuni ʻo Kauaʻi ma luna o ka puʻu ma ke kaona liʻiliʻi i kapa ʻia ʻo Waimea. A ʻo ke ea ka mea e pilikia nei i nā lāʻau make haipilikia, a me ka GMO nō hoʻi e lele ana i ke ea ma muli o kā lākou ʻoihana. Kau ʻia mai nā pilikia e kēia mau mea ʻino. No laila, i ka makahiki 2000, ua hāpai ʻia kekahi palapala hoʻopiʻi e Klayton Kubo, he kamaʻāina no Waimea, a ua kākau inoa ʻia e ka poʻe o Waimea kekahi. Nui nā inoa i loaʻa i ua palapala nei. Ma o ia palapala hoʻopiʻi, hoʻolaha ʻia ko Pioneer hoʻohaumia ʻana i ka ʻāina a me ke ea. ʻAʻole maopopo i ka lehulehu ka mea pōʻino o laila, akā, nui nā lāʻau make haipilikia ma ka lepo, a na ka makani e halihali aku ma loko o nā hale o ka poʻe e noho ma Waimea. Akā, aia nō a hala he ʻumi makahiki, a laila ʻae aku ke kalana o Kauaʻi e hoʻomaopopo a e ʻimi i haʻina no kēia pilikia. ʻAkahi a lohe ʻia ka leo o kānaka.

I ka lā ʻumikūmamāhiku o Ianauali, makahiki 2013, ua naue aʻela ʻekolu aloha ʻāina i ke keʻena hālāwai ʻaha ma Kauaʻi. ʻO lākou a ʻekolu, ʻo ia hoʻi ʻo ʻAnakala Walter Ritte (he mea hōʻeuʻeu politika Hawaiʻi), Vandana Shiva (he mea hoʻopulapula kaiāpuni), a me Andrew Kimbrell (he luna hoʻolaukaʻi i ka meaʻai pono). I ia keʻena, walaʻau ana lākou e pili ana i nā hewa o nā hui biotech a me ke ʻano hana o lākou i ka hoʻoulu ʻana i nā meaʻai, ka ʻāina, a me ke ea. Maikaʻi nō ka hana a lākou, no ka mea, ua kōkua nō i ko ka poʻe hoʻomaopopo ʻana i ke koʻikoʻi o kēia mea.

I ka lā ʻumikūmamāono o Malaki, makahiki 2013, mālama ʻia he kaʻi hele ma Kauai i kapa ʻia ʻo “March in March.”  I kēlā lā, nui ka poʻe i kaʻi pū. Ma ka lā ʻeiwa o Kepakemapa, aia kekahi kaʻi hele i kākoo i ka Pila 2491, a me ka hoʻomalu ʻana i nā pono sivila o ka lehulehu. Ma ka lā ʻumikūmamāono o Nowemapa, ua ʻāpono ʻia ka pila e ke kalana o Kauaʻi, akā, ʻaʻole i puka maʻalahi mai. ʻO ka mea ʻāpiki loa naʻe, i kēia manawa, ke hoʻomaka nei ʻo Pioneer i kekahi hihia hou aku. Wahi a lākou, na ka palapala e ālai ana i ka hiki iā lākou ke hoʻonui i ka mālaʻai nui a lākou. ʻAʻole naʻe i pololei.

Maopopo iā kākou ka pilikia o kēia mau hui. No laila, no ke aha i ʻae ʻia ai ko lākou noho mau ʻana mai ma ʻaneʻi? Ua wehewehe nā kauka a me nā loio nui nā maʻi ma ka hulina komohana o Kauaʻi ma muli o ka lāʻau make kaiapuni. Ke hoʻomake nei kēia ʻano hui i ka poʻe a hele a maʻi ka poʻe; ʻaʻohe maikaʻi, ʻaʻohe pono, ʻaʻohe hāʻehuola.

Pono loa iā kākou ke mālama ʻāina; ʻaʻole momona ka lepo no ka mea ke hoʻohaumia nei kēia mau hui biotech i ka ʻāina laʻa. Akā, ke aʻo aku kākou he mea pōʻino kēia mau hui, e hui pū nō kākou a kūʻē i ka hewa. Pēlā e ola ai ka lehulehu.

© Hāmiha Arquette . 2014

© kauluhoi 2017