No ke kai kūʻono ʻo Keawaʻula
na Kūlia Johnson

Kalei: E Kūlia! E hele aku kāua i Yoks i kēia hopena pule!

Kūlia: I hea?

Kalei: I Yokohama Bay!

Kūlia: I Yokohama Bay? Aia i hea kēlā? Ma Iāpana? (ʻakaʻaka)

Kalei: (ʻakaʻaka) ʻO Keawaʻula hoʻi ia, kahi a nā kāne nohea e heʻenalu ana ma nā nalu nui!

ʻOiai ʻo Keawaʻula ka inoa o ia kahakai ma kēlā hulina komohana o Oʻahu nei, mai hea mai kēia inoa ʻo “Yokohama?” Lohe mau ʻia ka puka ʻana o ia inoa ʻo Yokohama a i ʻole “Yoks” mai nā waha o nā kamaʻāina o nei mokupuni. I kaʻu lohe mua ʻana i ka inoa no kēia kahakai keu a ka uʻi ma ka moku ʻo Waiʻanae, ua hea ʻia kēia wahi ma ka inoa ʻo “Yoks.” Aia nō ka inoa ʻo “Keawaʻula” ma kēlā papa hōʻike i laila i maopopo pono ai iā kākou a pau ka inoa kūpono o ia awa, akā, ʻo “Yoks” a i ʻole ʻo Yokohama Bay ka inoa i hea mau ʻia. 

Wahi a ka mea kākau o Place Names of Hawaiʻi, ua kapa ʻia kēia kahakai ʻo Yokohama Bay ma muli o ka lehulehu o nā lawaiʻa Kepanī i lawaiʻa ma ia awa (ma kahi o ka makahiki 1900). Ma kēlā wā, ua hele ke alahao a hiki i Keawaʻula a ua eʻe nā Kepanī i ke kaʻaahi a holo a hiki i laila no ka lawaiʻa ʻana. Ma muli o ka nui o nā Kepanī e lawaiʻa ana ma Keawaʻula ua kapa ʻia kēia wahi ʻo Yokohama, e like me Yokohama ma Iāpana, kahi wahi kaulana i ka lawaiʻa. Akā, e hoʻomaopopo kākou i ka inoa kahiko o kēia wahi nei a mālama.

He aha ka waiwai o ka mālama ʻana i nā inoa kahiko? Ma kekahi ʻano, he waiwai ko nā inoa a pau. He moʻolelo ko ka inoa ʻo Yokohama, a he moʻolelo ko ka inoa ʻo Keawaʻula. Eia kaʻu kuhi: ʻoiai ʻo Hawaiʻi kēia a ʻo ka ʻōlelo Hawaiʻi ka ʻōlelo makuahine o nei ʻāina, ʻoi aku ka waiwai o ka hoʻopuka ʻana i nā inoa kahiko Hawaiʻi. 

ʻO Keawaʻula ka inoa kūpono, a he kumu ko kēia inoa. I ka wā ma mua, he nui a hewahewa nā mūheʻe e holo ana ma ia awa a ua ʻike ʻia ka ʻula o ia mau mūheʻe ma ke kai; he awa ʻula hoʻi ia. Mele ʻo Keale no kēia ʻula i kāna mele ʻo “Aia i Keawaʻula” penei:

Aia i Keawaʻula
Noho ʻula i ke kai malino
ʻŪnihi kau i ka hano
Ka lae o Kaʻena e

Ma ua mau lālani nei, mele ʻia ka ʻula o kēia kai malino. He kai keu a ka uʻi hoʻi ia ma ka lae o Kaʻena i hanohano mau ʻia e nā Hawaiʻi.

I ka wā kahiko, ua hele nā ʻuhane o nā kānaka i hala i Keawaʻula ma “Ka-hoʻihoʻi-Wākea” e ʻike i ko lākou mau ʻaumākua. Wahi a ke kākau moʻolelo, inā ua mākaukau ʻole ke kanaka i make no ka hala ʻana, ua hoʻihoʻi ka ʻaumakua i kona ʻuhane i kona kino e ola mau ai. A ʻo nā kānaka i mākaukau, ua hoʻouna ʻia lākou i kēlā wahi hoʻi ʻole mai. 

Eia kekahi o nā moʻolelo kahiko no kēia awa ʻo Keawaʻula. Ua ʻike nō kākou i ka waiwai o ka hoʻohana ʻana i nā inoa Hawaiʻi i maopopo ʻole ʻia i ka hapa nui o nā kānaka e noho nei ma ʻaneʻi. E like me: Sandys, ʻo ia hoʻi ʻo Awāwamalu; ʻEwa Beach, ʻo ia hoʻi ʻo Honouliuli; Hawaiʻi Kai, ʻo ia hoʻi ʻo Maunalua; a pēlā wale aku. No laila, e nā Hawaiʻi! E mālama kākou i nā inoa Hawaiʻi o ko kākou home aloha nei. Ma kēia mua aku, e hoʻāʻo ana au e aʻo i nā inoa Hawaiʻi a kūpono no ko kākou ʻāina nei a e hea aku i kēia mau wahi ma ka inoa kūpono. E aho kākou e aʻo a ʻōlelo i nā inoa Hawaiʻi o ko kākou home aloha. 

© Kūlia Johnson . 2014

© kauluhoi 2017