ʻO Waikīkī, ʻĀina Hulihia
na Aya Ueda

ka makeke

ʻAuhea ʻoukou e nā makamaka e noho ana i ka pae ʻāina nei, mai Hawaiʻi a Niʻihau. ʻO ka manawa i pau ai ka makahiki 2013, ʻo ia ka manawa i pau ai ke ola o ka Mākeke o Nā ʻĀina Like ʻOle ma Waikīkī. Ua hoopau ʻia ka hapa nui o nā hale kūʻai i loko o ka mākeke ma ka lā 31 o  Kēkēmapa. Ke hoomau ʻia nei nō kekahi mau hale kūʻai i kēia manawa, akā naʻe, e hoopau ʻia ana lākou i ka lā 31 o Ianuali 2014. E hoopau ʻia ana nō hoʻi ka hōkele ʻo Miramar ma Waikīkī i ia lā. Ma hope o kēlā, e wāwahi ʻia ana ka mākeke a me ka hōkele. E kūkulu ʻia ana ke kikowaena kūʻai hou i laila. E hoʻololi hou ʻia ana ka ʻāina ʻo Waikīkī.

I ka wā ma mua, ua kikī ka wai ma Waikīkī, e like me ka manaʻo o kona inoa. Ua kahe mai nā kahawai mai Koʻolau mai, no laila, momona ka ʻāina ʻo Waikīkī. Nui ko Waikīkī mau loʻi a loko iʻa. Ua hoʻoulu ʻia ke kalo a me ka iʻa, a pēlā i hānai ʻia ai ka poʻe o Waikīkī, a na ka poʻe hoʻi o Waikīkī i mālama i ko lākou ʻāina. Aia kekahi mahele o Waikīkī i kapa ʻia ʻo Kaluaokau, ʻo ia hoʻi kahi e kū ana ka Mākeke o Nā ʻĀina Like ʻOle a me ka hōkele ʻo Mirimar. Ua kahe ke kahawai ʻo ʻĀpuakēhau ma Kaluaokau. Aia he heiau i kahi kokoke i ke kahawai ʻo ʻĀpuakehau, kahi hoʻi i mōhai ʻia ai ke kahuna nui, ʻo Kaʻōpulupulu. ʻO ia ka mea nāna i hoʻopuka i ka wānana penei: “I nui ke aho a moe i ke kai, no ke kai kā hoʻi ua ʻāina.” Ma hope aku, pepehi ʻo ia iā Kahahana. Wahi a Andrea Feeser i kākau ai i loko o kāna puke ʻo Waikīkī, aia ka hale aliʻi hoʻonanea o ka Mōʻī Lunalilo ma Kaluaokau. Ua ili ka hale i ke Ali‘i Wahine Emma ma hope o ka make ʻana o Lunalilo. Ma hope mai o kēlā, mālama ʻia ua wahi nei e ka Hui o Ka Mōʻī Wahine Emma.  

Ma ka makahiki 1957 i kūkuluʻia ai ka Mākeke o Nā ʻĀina Like ʻOle ma Kaluaokau. Aia nā hale kūʻai a me nā hale ʻāina he nui i loko o ia mākeke. ʻAʻole wale nō nā hale kūʻai i laila, akā kūkulu ʻia ka loko wai a me ka wailele, a mālama ʻia ke kumu lāʻau paniana i kanu ʻia i laila ma kahi o 100 makahiki aku nei, i mea e ʻumeʻume ai i ka poʻe mākaʻikaʻi e kipa aku. He mea maʻa mau ka paʻapū ʻana o ka mākeke i ka poʻe mākaʻikaʻi. I kēia au, ʻaʻole ke kuleana o ka ʻāina ʻo ka hoʻolako ʻana i ka ʻai a me ka iʻa, a me ka hānai ʻana i ka poʻe o Waikīkī. ʻO ka hoʻokumu ʻana i nā hale kūʻai a me nā hōkele, a me ka hoʻokipa ʻana i ka poʻe mākaʻikaʻi, ʻo ia ke kuleana hou o Kaluaokau. 

I kēia manawa, e pau ana ka mākeke a me ka hōkele no ka papahana holomua o Waikīkī. E kūkulu ʻia ana ke kikowaena kūʻai hou, a ʻaʻole e kūkulu hou ʻia ana ka hōkele ʻo Miramar.  Ua kū ka hōkele no ka hoʻokipa ʻana i nā malihini no 40 makahiki. Wahi a ka luna hoʻohana o ka hōkele  Miramar, ʻo ia hoʻi ʻo Ted Sakai, ua hoʻonaʻauao a kōkua aku ʻo ia i nā limahana o ka hōkele i mea e loaʻa ai ka hana hou iā lākou. He hālāwai kāna me kekahi mau hōkele ʻē aʻe, he ʻano job fair no nā limahana, a loaʻa ka hana hou i ka 15 pakeneka o nā limahana i ia lā. Aʻo mau aku ʻo ia i nā limahana i ke kuanaʻike Hawaiʻi, ʻo ia hoʻi ka pono, ka lōkahi, ka heahea, a me ka hōʻihi. E pau ana ka hōkele, a e haʻalele ana nā limahana o ka hōkele iā Kaluaokau. Ke lana nei koʻu manaʻo, maikaʻi wale nō ko lākou nohona i kēia mua aku.

E kūkulu ʻia ana ke kikowaena kūʻai hou ʻo Saks Fifth Avenue a e hoʻopili ʻia ana i kekahi hale kūʻai ʻo Macy’s, a kūkulu ʻia nō hoʻi ke kahua hoʻokūkū ka‘a nui i laila. Kohu ʻāina Nū Ioka nō kēlā wahi, a like paha ka hopena me ka wānana a Kaʻōpulupulu; e lilo ana ka ʻāina i ka mea i hele mai mai ke kai mai. Pau ke kahawai ʻo ʻĀpuakēhau, ka loʻi, ka loko iʻa, ka Mākeke o Nā ʻĀina Like ʻOle, a me ka hōkele Miramar. E hoʻololi hou ʻia ana ke kuleana o ka ʻāina a me nā kānaka e hana ana i Kaluaokau. E mau ana nō ka loli ʻana o Waikīkī.

© Aya Ueda . 2014

© kauluhoi 2017