ʻAʻohe nao ʻai i ka pāpaʻa
na K. Kuapuʻupāpaʻa

E Ka Ulu Hoi ē, Aloha ʻOe: 

Ma ka wā kahiko he Aliʻi ko nā mokupuni pākahi, a ma lalo ona he mau kaukau aliʻi a ma lalo o lākou he mau konohiki. Na lākou aliʻi āpau ke kuleana e mālama i nā makaʻāinana a pēlā ka hana o nā ʻAha ʻŌlelo o ke Aupuni o ka Mōʻī Kauikeaouli Kamehameha III a hiki i ko ka Mōʻī Wahine ʻo Liliʻuokalani noho ʻana ma luna o ke Aupuni. No laila, eia kekahi manaʻo; he ui, he nīnau; He aha lā ke kuleana o ka poʻe ʻAha ʻŌlelo e noho nei ma ko kākou kulāiwi? Na lākou ke kuleana e mālama iā kākou? A i ʻole ʻo kā lākou hana ka pāʻani ʻana i kā kākou kālā i hopu ʻia i nā ʻauhau i loʻohia ai ma luna o ko kākou mau kuapuʻu i pāpaʻa ʻia i nā kukuna o ka lā? ʻO ia paha ka manaʻo o kekahi “Luna Makaʻāinana.”

ʻO K. Mark Takai ka mea i hoʻohiki ʻia ma ke ʻano he Luna Makaʻāinana no ka “moku” (district -ʻaʻole e hoʻohana ʻia nei kēia “moku” me ka manaʻo Hawaiʻi, he unuhina wale kēia o ka manaʻo malihini) 33 o kēlā “aupuni” e noho nei ma ko Hawaiʻi Pae ʻĀina. Pāpaʻa nā kua puʻu o kona mau makaʻāinana mai ka ʻāina ʻo Hālawa a hiki i ka ʻāina ʻo Waimalu. Wahi a Hawaiʻi News Now, na Takai i hoʻopuka i ka manaʻo e hāʻawi aku ke aupuni i ka ʻaha pāʻani hoʻoikaika kino o ke kula nui o Mānoa i kekahi makana, he ʻumi miliona kālā mai ka waihona kālā mai o ke aupuni. He aha lā ka pono o ia makana? ʻAʻole nō akamai nā kanaka pāʻani pōpeku o kēia kula i ka pāʻani pōpeku ʻana; ma kēia makahiki nei, hoʻokahi wale nō pāʻani a lākou i lanakila ai! No ke aha kākou e makemake ai e kīloi aku i kā kākou kālā i nā kānaka eo?

Ma kēia wahi “hoʻoulu ʻike” o Mānoa, nui nā pilikia i hiki ke hoʻohemo ʻia i ia makana kālā. ʻO kekahi ka lawa ʻole o nā papa e komo ai. ʻAʻole i hiki i kekahi hapa o nā haumana ke komo i papa ʻŌlelo Hawaiʻi i ke kau kula hāʻule lau o ka Makahiki 2013, no ke ʻoki ʻia ʻana o ua mau papa nei. ʻO kēia mea kākau haʻahaʻa kekahi o ia mau haumāna i hiki ʻole ke komo i ka Papa ʻŌlelo Hawaiʻi 321, a ma ka lā 23 o ka Malama ʻo ʻAugate loaʻa iā mākou kekahi leka uila nāna i ʻōlelo mai, “We regret to inform you that due to budget cuts, we had to reduce our course offerings this semester.” Auē! Ma muli o ka nele ʻana o kēia kula i ke kālā ʻole, ke kaupalena ʻia nei ka ulu ʻana aʻe o ko kākou aʻo. Ua maloʻo ke kula o Mānoa i ke kakali ʻana i kā ka ua Kuahine kilinahe ʻana.

Ma ka pō o ka lā ʻeiwa o kēia mahina nei, ua hoʻāʻo kekahi wahine hele kulanui e kelepona aku i nā kiaʻi kula no ka ʻalo malu ʻana iā ia i kona hale noho haumana, akā ua pau nā kelepona i ka pio. ʻAʻohe kālā e hoʻoponopono ai. Ua pono i kēlā wahine ke kelepona i kāna kāne a na kāna kāne i kalaiwa i Mānoa mai Honouliuli mai i mea e ʻalo malu ai i kāna wahine. Ua hūnā ʻia ka inoa o ua wahine nei akā ua ʻike paha ʻoukou i ka leka uila i hoʻouna ʻia ma ka lā ma hope mai o kona pilikia. ʻO ke poʻomanaʻo o ia leka uila, ʻo “UHM Campus Security experiencing phone outage”, i hoʻouna ʻia mai ma ka lā 10 o Pepeluali.  He aha ka waiwai o nā kiaʻi hikiʻole ke pane i ke kāhea? He aha ke kumu o ka make ʻana o ia mau kelepona? Nele paha ke kula i ke kālā ʻole? 

Auē kēia kula ʻilihune ē! ʻAʻohe ona papa a pio kona mau kelepona. Pehea e ʻula ai ka lae o kēia mau pua? ʻOiai uwē nā haumāna, mau nō ka manaʻo o kekahi luna e hoʻopuehu i ka waiwai o kā kākou kālā, ka hua o ka pāpaʻa ʻana o ke kua i ke kukuna o ka lā i ʻauhau ʻia, a hoʻonalo akula i ka pāʻani a me ka ʻuhaʻuha. I ka wā ma mua, ʻo ka Luna maikaʻi ka i hoʻomāhelehele i ka waiwai o nā makaʻāinana i mea e pōmaikaʻi ai lākou āpau. Inā e hoʻolilo ʻia ana ke kālā ʻauhau a kākou ma kēia kula nui, pono e kākoʻo ʻia nā haumāna a me nā kumu, a me nā hale kula, a me nā limahana. No ka mea, he wahi hoʻonaʻauao kēia kula nui, ʻeā? 

Ua kapa ʻia kā Takai Pila ka HB 2027. ʻAʻole ia i hoʻokō maoli ʻia. No laila, inā he manaʻo kou e Hawaiʻi, ma paʻa i ka leo. E haʻi aku i kāu Luna ʻaʻole kou ʻiʻini ʻo ka nalowale ʻana o ko kākou waiwai i ka ʻuhaʻuha. E waiho i kou manaʻo ma http://www.capitol.hawaii.gov/measure_indiv.aspx?billtype=HB&billnumber=2027&year=2014. E paipai aʻe i ke kākoʻo i ke aʻo ʻana ma ke kula, no ka mea ʻo ke aʻo ʻana ke kuleana o ke kula ʻeā? He manaʻo wale nō paha kēia no kekahi mea kākau haʻahaʻa; ʻAʻole wau he Luna Makaʻāinana. He mea maikaʻi paha ke kīloi ʻana i ke kālā i nā kānaka akamai ʻole o kēia kula nui. 

Na K. Kuapuʻupāpaʻa -Ke “Kula” o Mānoa, Oʻahu

© K. Kuapuʻupāpaʻa . 2014

© kauluhoi 2017