He papa mokomoko
na mahiʻai dochin

Aloha e nā hoa makamaka o ka hoʻonaʻauao, mai ke kula alualu kālā ʻo Shidler ā hiki i ke kula ʻimi ʻike Hawaiʻi ʻo Kamakakūokalani. I kēia kau, ua hoʻokumu ʻia kekahi papa hou i loaʻa ʻole ma mua i ke kula nui o Hawaiʻi, ʻo ia ka papa mokomoko ʻōlelo Hawaiʻi.

He papa mokomoko nō ia, akā ʻo ka mea hoihoi kona aʻo ʻia ʻana ma ka ʻōlelo Hawaiʻi wale nō. ʻO Keoki Faria ka mea nāna e aʻo ana i ka papa, a he kanaka ʻoluʻolu a mālie ʻo ia. No laila, inā pīhoihoi ka naʻau i ke komo ʻana i kekahi papa mokomoko, mai makaʻu! No ka poʻe ʻōlelo Hawaiʻi kēia papa, mea ʻole ia inā ʻakahi ʻoe a hoʻomaka i ke aʻo, a kumu ʻōlelo Hawaiʻi paha. He mea kēia papa e hoʻoikaika ai i ka ʻōlelo a me ke kino i ka manawa like. Inā ʻaʻole ʻoe i hana mua i ka mokomoko a i ʻole kekahi mea like, ʻaʻole pilikia, hiki nō ke luʻu pū i kēia hana. Inā ʻoe he mea maʻa i ka mokomoko, he manawa kūpono kēia e hoʻokāʻoi ai a e hoʻoulu aʻe ai i kou ʻike. Eia hoʻi, manuahi ke komo ʻana i ka papa. 

Ua komo aku kou wahi mea kākau i ia papa i kēlā pule aku nei. I ka makamua, pīhoihoi koʻu naʻau, akā hoʻolauna maila ʻo Keoki iā ia iho, a ua ahuwale kona ʻoluʻolu. Ua hoʻomaka ka papa me ka mālie, he hoʻomehana kino a hoʻomālō kino. A laila aʻo ʻia he mau ʻano peku me ke kāʻalo ʻana i ia mau peku, a hoʻomaʻamaʻa akula mākou me nā pakanā. Hele aʻela ʻo Keoki a puni ka lumi e kōkua aku i nā haumāna a e hoʻoponopono hoʻi i ka hana a nā haumāna. Keu aku ʻo ia a ka hoʻomanawanui, a ua maʻa nō i ka mokomoko. 

Aia ka papa ma Hemenway 208 (ma luna o Bale) ma ka 4:30-5:45 o nā Pōʻalima. Inā loaʻa nā mikilima mokomoko a i ʻole nā pale wāwae iā ʻoe, e lawe mai ke ʻoluʻolu. E hele mai nō inā he mea hoihoi kēia papa iā ʻoe, a e lawe mai i nā hoa inā makemake. E ola nō ke kino, e ola hoʻi ka ʻōlelo makuahine.

© Mahiʻai Dochin . 2014

© kauluhoi 2017