Kīpū ʻia Kekahi Keikikāne e nā Mākaʻi
na mahiʻai dochin

He ʻumi kūmāhiku makahiki o ke keikikāne nona ka lima i kīpū ʻia. He haumāna ia ma ke kula kiʻekiʻe ʻo Roosevelt ma mua, akā ʻaʻole ʻo ia e komo ana i nā papa i kēia kau nei. Ma ka lā iwakālua kūmākahi, ua hele ʻo ia i ke keʻena kumu aʻoaʻo, a kelepona koke akula ke kumu i nā mākaʻi. ʻAʻole ʻike ʻia ke kumu o kāna hele ʻana i laila. 

Ua hoʻāʻo nā mākaʻi e hopu iā ia no ka mea ʻaʻole ʻo ia i hoʻi i kona hale no ka wā lōʻihi. Akā iā lākou e hoʻāʻo ana, ua ʻō ke keikikāne i ka umauma o kekahi mākaʻi i ka pahi. Kuʻi akula ua ʻōpio lā i ʻelua mākaʻi ʻē aʻe, a holo aku. I ia manawa nō, kī kekahi mākaʻi i kāna pū he ‘elua manawa, a kū ka lima o ka ʻōpio i ka pōkā. 

ʻAʻole e make ana nā mākaʻi i ʻeha, a pēlā pū me ka ʻōpio. Akā naʻe ua puni ke kula ʻo Roosevelt i ka makaʻu. Ua kau nō hoʻi ka weli o nā mākua i ke kuʻi ʻana o ka lono. 

Ua mea aku ʻo Tenari Maafala, ʻo ia hoʻi ka pelekikena o ka hui mākaʻi o Hawaiʻi, “ʻAʻole i hele nā mākaʻi i ke kula me ka makemake e kīpū aku i kekahi kanaka.”

ʻO kaʻu nīnau, no ke aha i kelepona ʻole ai nā kumu aʻoaʻo i nā mākua o ka haumāna i haʻalele loa i kona hale, ma mua o ke kelepona ʻana i nā mākaʻi? 

© Mahiʻai Dochin . 2014

© kauluhoi 2017