Ua ʻEha nā Maka
na kahanuola solatorio

Ke īpuka aniani o ka hale aliʻi

E Oʻahu ka ʻōnohi o nā kai ʻewalu. Mai Koʻolaupoko i ka malu o Keahiakahoe a i ka ʻāina wela ʻo Waiʻanae, kahi i pā mai ai ka makani Kaiāulu. Mai ke kai kaulana ʻo Kalehuawehe a i Waialua, ʻāina kū pālua i ka laʻi. Mai ʻEwa, kiaʻi ʻia e Kaʻahupāhau a i nā pali ʻaʻala aʻo Koʻolauloa. Mau loa koʻu aloha nou e Kauliluaikeanuwaialeale a ua hāmama nā puʻuwai aloha no ka Mōʻīwahine i aloha nui ʻia. Me ʻoe ka welina o ke aloha e ka mea heluhelu.

Ua ʻeha nā maka o kēia lāhuikanaka i ka ʻike maka ʻana i kekahi mea pono ʻole. ʻAʻole hiki iaʻu ke piliwi i ka hewa i hana ʻia i ka hale hanohano o nā aliʻi. I ke kakahiaka o ka lā ʻewalu o Pepeluali, ua hiki mai ʻelua mau kānaka ma ke alo o ka Hale Aliʻi ʻo ʻIolani a ua piʻi aʻe lāua ma luna o ke alapiʻi keʻokeʻo. I ko lāua hiki ʻana i mua o nā ʻīpuka, ua ʻī akula kekahi o lāua, “Noʻu kēia hale, noʻu kēia hale,” a ʻo kona peku akula nō ia i ka ʻīpuka aniani o ia hale kupaianaha. ʻO ka hale aliʻi ʻo ʻIolani ka luaahi a ʻo Drew Paʻahao lāua ʻo Koa Aliʻi Keaulana nā kolohe ʻelua i wāwahi i nā ʻīpuka aniani o ua hale aliʻi nei.

Ua hopu ʻia ʻo Paʻahao lāua ʻo Keaulana e nā mākaʻi ma ka hola ʻewalu o ia kakahiaka. ʻO ke kumu o ia hopu ʻia ana, ʻo ia hoʻi ka hōʻino ʻana i kekahi mea waiwai (criminal property damage). ʻOiai, aia he wikiō kiaʻi i hōʻike aku na lāua i hana hewa, ua hoʻokuʻu ʻia lākou e ka Honolulu Police Department. He aha lā ke kumu o ia hana hewa i nei waiwai a ka lāhui ʻili ʻulaʻula? ʻO ka pupule ʻoe, ʻo ka lāʻau ʻino ʻoe, ʻo ke kūʻē ʻoe, a i ʻole ka hūpō. ʻO ka mea ʻāpiki loa, he Hawaiʻi lāua a ʻaʻohe o lāua hōʻihi no ko kākou mau hulu kūpuna.

Ua hoʻokumu ʻia ka Hale Aliʻi ʻo ʻIolani e ka Mōʻī Kalākaua i ka makahiki 1882. I kēlā manawa, he $340,000 kālā i hoʻolilo ʻia no ka hale holoʻokoʻa. I ka wā iā Kalākaua, ʻaʻohe hale e like ai me ka hale aliʻi ʻo ʻIolani ma Hawaiʻi nei no ka mea ua kaʻapuni ʻo ia a puni ka honua i mea e ʻike maka ai i nā lāhui ʻē aʻe. I kona huakaʻi ʻana, ua ʻike ʻo ia i nā mea hou o ka honua a laila, ua hoʻihoʻi mai ʻo ia i ia mau makana i Hawaiʻi nei. Iā ia ma Kapalakiko, ua halawai ʻo Kalākaua me ka mea nāna e hana i kēia ʻano aniani. Wahi a kahiko, ʻo kēia mau aniani pani puka ā Paʻahao i peku ai, ʻo ia nā aniani maoli a Kalākaua i koho ai. 

Wahi a ka waha ʻōlelo no ka Hale Aliʻi ʻo ʻIolani, ʻo ka manawa ʻelua kēia i wāwahi ʻia ai kēia mau ʻīpuka. I ka makahiki 1984, ua nou ʻia he pōhaku nui e kekahi haole a ua wāwahi ʻia nā ʻīpuka aniani ʻelua. I ia manawa nō, ua ʻimi nā luna o ka hale aliʻi ʻo ʻIolani i kekahi kāne i hiki ke hana hou i kēlā ʻano aniani me ka ʻāwīwī a me ka maiau, akā he pipiʻi nō. I kēia mau lā, he $20,000 kālā ke kumu kūʻai no ke pani hakahaka ʻana i ia ʻano aniani ʻoiai ʻo ka mea i wāwahi ʻia, ʻo ia ke aniani maoli. Eia kā, he aha ka hoʻopaʻi kūpono no ia hana hewa? ʻO ia hoʻi, e paʻa ʻo Paʻahao i loko o ka hale paʻahao, ʻoiai like kona inoa me ia hale ʻino.

He mana ko ka hale aliʻi ʻo ʻIolani no ka mea i laila nō i mālama mau ʻia ai ke ea o kēia ʻāina nei. I kēia mau lā, he hōʻailona ia e kū haʻaheo ana ma waena o ka haunaele o ka honua. Mai poina ʻoukou, ʻo kēia ka hale hanohano o Kalākaua lāua ʻo Liliʻuokalani no laila na kākou ke kuleana no ka mālama mau ʻana i ia puʻuhonua. ʻOiai ke welo hoʻokahi ka hae Hawaiʻi ma ka piʻo o ia hale, he ʻāina kapu nō ia ʻo Pohukaina. E ola mau loa ka ʻāina i ka malu o nā lani.

E ka makamaka heluhelu, i mea e hoʻohanohano ai a aloha ai i ka hale a me ke aliʻi nona kēia mea waiwai, a i kani ʻū ai no ka pau ʻana o ke aniani kahiko, ua haku kou mea kākau i wahi kanikau no ua aniani nei. He pono, a he pono ʻole paha, akā pēlā i kūmākena ai ka poʻe kahiko i nā mea waiwai i hala aku. Lana aʻe ka manaʻo e ʻaelike mai ʻoe i kēia hoʻomau ʻana i ka loina a kahiko.

 

He Kanikau

Halehale ka paia, kū kilakila
I laila i ka malu ʻo Pohukaina
ʻĀina hoʻoheno a ka lāhui
Hui nā maka i kou ʻoluʻolu
Welo hoʻokahi ka hae
Kīlepalepa i ka makani
A he nani, a he waiwai 
ʻO Kaulilua i ke anu ē
A hoʻi ke aloha i Waiʻaleʻale
Kuʻi o uka, peku o kai
Ia anianikū o ke alo
Alo lua i ke ea
Ua ʻeha nā maka, ka ʻili ʻula
Te tama, ka pua, ka lei
A lei nō au i ko aloha ē
ʻO Kamakaʻeha ē

© Kahanuola Solatorio . 2014

© kauluhoi 2017