Ua lohe anei ʻoe?
na kūlia johnson

E ka makamaka heluhelu! Ua lohe anei ʻoe? Ua hōʻino ʻia ka hale Aliʻi e kū nei ma kahi o ke alanui Mōʻī! Ma ka lā 8 o nei mahina, ua nahā ʻia ke aniani o ka ʻīpuka o ko kākou Hale Aliʻi ʻo ʻIolani i mau hūpō. Na ke kolohe i peku i ua aniani lā a haki ihola ke aniani nani kahiko o nei hale i kūkulu ʻia e ka mōʻī ʻo Kalākaua. 

Wahi a ka manu, ʻo KHON, ʻo Paʻahao lāua ʻo Keaulana nō ia mau hūpō. ʻO Paʻahao kai peku i ke aniani a nahā, a laila, ua komo ihola lāua i ka Hale Aliʻi me ka haʻakei. ʻAkahi hoʻi au a lohe i nei moʻolelo, a eia kaʻu e ui aku ai: No ke aha mai? He aha ke kumu o kēia hana naʻaupō a kēia mau kanaka ʻōiwi? A he aha hoʻi nā wahi manaʻo o ka lehulehu? He mea minamina kēia, a he mea hoʻi e pā ai ka naʻau. Eia hoʻi ko kākou Hale Aliʻi, e kū nei me ka haʻaheo a he ʻano hōʻailona no kākou, nā Hawaiʻi, no ko kākou kūlana ma ke au i hala a ma kēia au kekahi, a haele wale aku lāua a hana kolohe. 

ʻike ʻia nā komo hewa ma YouTube

Hewa nō kēia hana hūpō o ua mau kānaka nei. He mau kānaka Hawaʻi kēia, akā nō naʻe, he mau mamo na Waʻawaʻaiki-naʻaupo kekahi. Ua ui aku nā manu o KHON iā lāua i ke kumu no kēia hana kolohe, a pane mai ʻo Paʻahao ma ka ʻōlelo ʻana mai: “Because that’s my house. Yeah, that’s my house.” Nona ka Hale Aliʻi? Na wai i haʻi iā ia, ʻo kona hale ponoʻī nō ia? A na wai e wāwahi i ka ʻīpuka o ko lākou hale ponoʻī? Na ka pupule paha. Eia nō kekahi mau ʻōlelo i hoʻopuka ʻia e ka lehulehu no ia hana ʻino. Ua hū aʻe ka pīhoihoi i loko o nā Hawaiʻi a me na haole pū kekahi no nei hanana. ʻAʻohe mea e mānalo ai.

Eia naʻe, ua lohe pū ʻia nā leo e ʻano kala wale ʻana i ko lāua hana ma ka ʻī ʻana aku: he hewa nō kā lāua hana akā he mea ʻole ke aniani, ʻoiai ʻaʻole nō ia he mea Hawaiʻi. Wahi a lākou, ʻaʻole kēia he mea waiwai i ka nohona Hawaiʻi a me ka moʻomeheu Hawaiʻi. A he ʻoiaʻiʻo no; na ka haole i hana i ua aniani la. Aia nō ma ia aniani kekahi kiʻi o nā manu mai ka ʻāina ʻē a me kekahi wahine i kohu ʻole he Hawaiʻi. He waiwai paha kēia aniani i kohu i ka haole? He waiwai i koʻu manaʻo. ʻAe, he aniani nō ia i hana ʻia e ka haole, akā, he waiwai hoʻi ko nei aniani ʻoiai he ʻāpana ia o ko kākou Hale Aliʻi. ʻAʻohe hōʻihi o nā hūpō komo hewa no nā aliʻi o kākou i noho ma ia hale.

ʻO Kalākaua ka mea nāna i hoʻokumu i ia Hale Aliʻi. I kona holo kaʻapuni ʻana i ka honua, ua ʻike akula ʻo ia i ke ʻano o ka nohona o nā aliʻi ma nā ʻāina like ʻole a me nā mea hou o ke au, e like me ka uila, a nāna hoʻi i hoʻihoʻi mai i ia mau mea hou i Hawaiʻi nei. ʻO ka Hale Aliʻi ʻo ʻIolani kekahi o nā hale mua me ka uila e hoʻā ai i nā kukui. I mea paha e kū like ai ʻo Hawaiʻi me nā aupuni mana nui o ka honua, ua hoʻokumu ʻo ia i ia Hale Aliʻi ma ke ʻano kilakila o nā ʻāina ʻē, a me ka ʻike nō hoʻi o ka Hawaiʻi. 

Iā ia nō e hoʻokumu ana i ka Hale Aliʻi, ʻo Kalākaua nō kai koho i ia aniani no ka ʻīpuka o ka Hale Aliʻi. Koho ʻia kekahi kaha kiʻi ma Kapalakiko e kaha i ke kiʻi ma ia aniani i kūʻai ʻia mai ʻEnelani mai. ʻOiai he malihini nō ia kahakiʻi, i hele ʻole mai i Hawaiʻi nei, ʻaʻole kēia kiʻi i kohu he kiʻi Hawaiʻi. ʻO nā kiʻi ma ia aniani kona manaʻo no ke ʻano o nā manu a me nā wāhine o Hawaiʻi nei. Ua lawe ʻia mai nā mea like ʻole mai nā ʻāina ʻē mai e hoʻonaninani i nei Hale Aliʻi. 

I ka mahina o Kēkēmapa, i ka lā 31, MH 1879, ua hoʻomoe ʻia ka pōhaku kihi i mea e hoʻolaʻa ai i ke kūkulu ʻana i ka Hale Aliʻi hou. Ua ʻākoakoa ka lehulehu ma ka pā Aliʻi ʻo ʻIolani e mālama i hoʻohanohano no kēia kūkulu ʻana i ka hale o ke aliʻi a me ka lā hānau o ke aliʻi wahine ʻo Kapiʻolani. I ka makahiki 1882, ua pau ka Hale Aliʻi i ke kūkulu ʻia. ʻAʻole nō ia he hale i kūkulu ʻia ma ke ʻano o nā hale kahiko Hawaiʻi, akā, he hale nō ia i aloha nui ʻia e nā Hawaiʻi. Ma muli o ka waiwai o kēia hale nei a me ke aloha no nā aliʻi, ua ʻākoakoa ka lehulehu ma ia Hale Aliʻi nei no nā hanana like ʻole: ʻo nā ʻaha hulahula, ʻo ke kūʻē ʻana i ka hoʻokahuli aupuni, ʻo ke kākoʻo ʻana i ke aliʻi wahine Liliʻuokalani i kona wā e hoʻopaʻahao ʻia ana ma kona home, a pēlā wale aku. Ua kohu haole kēia hale ke nānā aku, akā, ʻaʻole naʻe kēia he mea ʻē i ko kākou lāhui.

ʻAʻole i kana mai ka nui o ka waiwai o ia Hale Aliʻi ʻIolani nei. ʻO ia iho nō ka home o ko kākou mau aliʻi aloha, a he hōʻailona no kākou a pau a me ko kākou kūlana ma kēia honua. He Hale Aliʻi kēia i aloha nui ʻia e nā Hawaiʻi, a he mea minamina hoʻi ka hōʻino ʻia ʻana o nei hale. He mea haole hoʻi kēlā aniani i peku ʻia, akā, ʻaʻole hoʻi kēia i hoʻēmi i ka mana a me ka waiwai o ia mea. He ʻāpana nō ia o ka home o nā aliʻi nui o ka mana. No laila, e ka makamaka heluhelu, o ko kākou kuleana kēia e mālama i nei Hale Aliʻi aloha nui ʻia. 

© Kūlia Johnson . 2014

© kauluhoi 2017