HAIAMŪ NĀ MANU!!
No Ka Hoʻomanaʻo ʻAna
I Ka Makahiki 125 O Ke Kahuli Aupuni
na kaleo pinto

    E ko Hawaiʻi poʻe manu makaʻala, ʻauhea ʻoukou? E nā ʻiʻiwi pōlena o Hualālai, nā pueo o Makawao, nā ʻiwa o Kaʻala, me nā koaʻe e kīkahakaha i nā pali ʻo Kalalau, e maliu mai. ʻO kēia ka wā kūpono o ka huli ʻia ʻana o nā alo i ka Hale Aliʻi ʻo ʻIolani. Hoʻokahi haneli me ka hapahā mau makahiki aku nei, i ka lā 17 o ʻIanuali i ka makahiki 1893, ua hoʻokahuli ʻia ko kākou aupuni a hōʻike ʻia ke ʻano ʻoiaʻiʻo o ka poʻe haole. I mea e hoʻokō aʻe ai i ko lākou ʻiʻini ʻino, ua kū ʻia ko lākou makemake ma nā kua o nā kānaka maoli o kēia ʻāina nei. Auē. Aloha nō. 

    I ka mahina nei, ma ka lā i piha aku ai he hoʻokahi haneli me iwakāluakūmālua makahiki mai ia lā kahuli mai, i huipū ai he kini a he lehu ma kahi o ka Hale Aliʻi ʻo ʻIolani i hoʻomanaʻo ai i ka hanaʻino a ke Comittee of Safety i hahau ai i ko kākou Mōʻī Poni, iā Lydia Liliʻu Loloku Walania Kamakaʻeha. 

    ʻO ka hoʻomanaʻo a me ka hoʻomaikaʻi ʻana aku i ka Mōʻī ʻo Liliʻu i ka lā 17, he keu ia hanana,, a ka haʻaheo. I ka puka ʻana mai o ka lā i ka Hikina, ua hoʻomaka ka hana mua me ke oli ʻana a me ka hāʻawi ʻana i hoʻokupu ma Maunaʻala, kahi e moe mai ana ko kākou poʻe aliʻi. Ua hīmeni ʻia ke aloha me ke kākoʻo no ka Mōʻīwahine hope loa o kākou. E like me ke mele "Ke ʻAla Kaʻu I Honi," he mele hoʻi e hoʻohanohano aku iā Liliʻu, ua honi ʻia nā ʻala onaona e māpu mai nei. Wehi ʻia kona ʻahu i nā ʻano lei like ʻole: ʻo ka maile ʻoe, ka pua melia ʻoe, ke kalaunu ʻoe, a pēlā wale aku. I ka wehi ʻana aku iā ia, ua lilo ke anaina o laila i lei nona me hoʻokahi manaʻo, e hoʻonani a hoʻomaikaʻi aku i ka inoa ʻo Liliʻu. 

    Ma kahi o ka hola 9 o ke kakahiaka, ua kaʻi hele ke anaina mai Maunaʻala mai a i ka Hale Aliʻi ʻo ʻIolani. ʻAʻole au i naue aku me ka hui, no laila ua ʻike maka au i ko lākou hōʻea ʻana aku. ʻOiai au e kū ana ma ke alapiʻi o ʻIolani Hale, ua ʻohu ka hale aliʻi i ka noe. He wā mālie hoʻi. Ma mua o ka hōʻea ʻana mai o ka lehulehu ma laila, ua lohe ʻia nā leo nahenahe e hāpai ʻia ana e ka makani kolonahe. Kū haʻaheo, e kuʻu Hawaiʻi. Ma luna o ka pā o ʻIolani, ʻike ʻia nā hae Hawaiʻi e welo ana me ka haʻaheo. Māmakakaua, o kuʻu ʻāina. Hoʻonui ʻia nā leo a wawalo ka leo o ka Lāhui. Ua pali ke kua a mahina ke alo o ka poʻe e kaʻi mai ana. Me he pahu lā, ua kani mai ka leo o Kumu Hinaleimoana Wong: ʻO ke ehu kakahiaka o nā ʻōiwi o Hawaiʻi nei. Na Kumu Hina a me nā mea kaulana ʻē aʻe i alakaʻi mai iā lākou. ʻĀ mai ke ahi i ko lākou mau maka a nakolo mai nā leo hīmeni i nā halekuʻi kiʻekiʻe o ke kaona. No kuʻu lāhui e hāʻawi pau a i ola mau. 

    Ma hope o ke komo ʻana o ke anaina i kahi o ka Hale Aliʻi, ua launa pū nā kānaka he alo a he alo. Haʻi mai nā kūpuna i nā moʻolelo o ko lākou ola a ua pāʻani leʻaleʻa nā keiki. Ma ke Kapitala, ua kuʻi nā kānaka i ke kalo i mea e hānai aku ai i ke anaina ma ka Hale Aliʻi. Ma ke kiʻi o Liliʻu e kū ana ma waena o ka Hale Aliʻi me ke Kapitala, ua hula a hīmeni ʻia ka hoʻomaikaʻi no Liliʻu e nā kula like ʻole a me nā hālau hula kekahi. 

    He nani nō ke anaina i huipū ma laila, he uluwehi ke ʻike aku. He ʻelua a ʻekolu paha kaukani ka nui o nā kānaka i ʻākoakoa mai ma laila. Wahi a Trisha Kēhaulani Watson, kai hoʻonoho aku i ka hanana, “This is just an amazing display of unity. People so often think that Hawaiians are not a unified people. People think that we fight, we bicker. But you look at a day like today, all the trustees are here from the Aliʻi Trusts. We have all these children from charter schools, public schools, private schools. We have the politicians who joined us. We have people from across Hawaiʻi, the grassroots communities, and we see that truly aloha brings people together, and that’s something for Hawaiians to know. We want the people of Hawaiʻi to know that, to know that our culture is powerful. Aloha is powerful, that our history is important.” I kēlā lā, ʻike ʻia kēlā ʻano aloha ma nā maka o nā kānaka, i hoʻāla ʻia i ke kūpaʻa ʻana ma hope o ka Mōʻī. ʻIke ʻia ke aloha i nā keiki e holo ana ma ka pā hale o ʻIolani Hale. ʻIke ʻia nō hoʻi i ka hoʻokūkū ʻana o nā manaʻo ma waena o kekahi kanaka me kekahi no ka hoʻopaʻa lōkahi ʻana i ka Lāhui holoʻokoʻa. No ka mea, ke ʻimi nei kākou a pau i ka pono o ko kākou ʻāina a me ka lāhui Hawaiʻi. I loko o kēia huipū ʻana, kupu aʻe kekahi mea ʻoiaʻiʻo: 125 mau makahiki aku nei, ua kukulu nā waimaka o ka lāhui no ka hana ʻino ʻia a me ka hopohopo no ka wā e hiki mai ana, a i ka makahiki 2018, ua kukulu nā waimaka no ka haʻaheo o ka Lāhui Hawaiʻi a me ka hoʻomanaʻo ʻana i ka ikaika kaulana o ka Mōʻīwahine Liliʻuokalani. 

    E ola mau ka inoa o ko kākou Mōʻīwahine. Na kākou ke kuleana o ka hoʻomanaʻo a hoʻomaikaʻi ʻana aku iā ia i kēlā me kēia lā, ʻaʻole ma ka lā hoʻokahi o ka makahiki. I nā lā a pau, e haʻaheo aku kākou i ka poʻe e kūpaʻa no ka pono o kēia ʻāina aloha. 

© Kaleo Pinto . 2018

© kauluhoi 2018