HE GMO nā meaʻai ʻOkanika
NA Kiʻi Pōhaku

I ulu no ka lālā i ke kumu. Akā naʻe, he aha ka hopena inā maʻi ke kumu? I kēia mau lā makemake nui ʻia ka meaʻai ʻokanika. Hilinaʻi ka lehulehu ʻaʻohe kemika i loko o nā meaʻai ʻokanika. Eia naʻe, wahi a kekahi poʻe ʻimi naʻauao, ʻo ke kumu i hele ai a maʻi nā kānaka, ʻo ke kūlana GMO ia o nā meaʻai ʻokanika a pau loa.

I kēia wā, ua hele a maʻa kākou i ka hoʻokomo ʻana o ka poʻe akeakamai i nā kemika i loko o nā hua GMO. He laʻana ko neʻi. Ulu kūpono nā ʻōhiʻa lomi ma nā wahi mehana e like me Kaleponi. ʻO ka pilikia, ke hiki mai ke kau hoʻoilo a anuanu ke ea o waho, hiki ʻole i ka ʻōhiʻa lomi ke ulu. No laila lawe ʻia ke kāmano mai ʻĀlaka mai. Pōʻalo ka poʻe akeakamai i ko ke kāmano ōewe a hoʻohui ʻia me nā ōewe o ka hua ʻōhiʻa lomi i ulu ikaika ka mea kanu ma nā wā anuanu. ʻAʻole kūpono ka hoʻololi ʻana i nā ōewe o nā hua no ka mea nele akula ia i ke kūlana ʻaiaola ʻole.

Hoʻololi hou ʻia nā ōewe o nā hua GMO me ke kemika Glyphosate, ʻo ia hoʻi ka ʻiʻo o ke kemika Agent Orange. Komo kēia kemika i ka hua GMO ma o ʻelua hana. ʻO kekahi, hano ʻia ke Glyphosate ma loko o nā hua GMO. ʻO kekahi, kī ʻia nā meaʻai GMO i ka RoundUp, i mea e hoʻomake ʻia ai nā nāhelehele me nā mea kolo. Akā, aia ke Glyphosate ma loko o ka wai RoundUp kekahi, no laila komo aku nō... ʻO ke kumu no ka hoʻokomo ʻana i ke Glyphosate i loko o nā hua, i hiki ke kī ʻia nā mea kanu i ka RoundUp, a ola mau nā mea kanu GMO. ʻO ka mea e ʻokoʻa ai nā meaʻai ʻokanika me nā GMO, ʻaʻole kī ʻia nā mea kanu ʻokanika i ka RoundUp. No ka ʻole o ka RoundUp ma ka mea kanu ʻokanika, ʻo ia ke kumu i hiki ai i nā hale kūʻai ke hoʻolaha i kā lākou meaʻai ʻokanika me he mea la hāʻehuola ia, akā mau nō paha kona ʻano he GMO.

I ka makahiki 2012, hoʻolaha ʻia ka palapala "Long term toxicity of a Roundup herbicide and a Roundup-tolerant genetically modified maize," pili i nā GMO. ʻO Gilles-Eric Seralini ka luna akeakamai. I ia wā he kumu ʻo ia ma ke Kula Nui ʻo Caen ma Palani, a he kahu nānā no nā ʻiole. Hoʻokaʻawale ʻia nā ʻiole i ʻehā mau hui. Hoʻokahi o nā hui ʻiole, ua hānai ʻia i nā meaʻai GMO. Ma ka hui ʻelua, hānai ʻia i ka meaʻai i kī ʻia i ka RoundUp. ʻO ke kolu o nā hui, hānai ʻia ka meaʻai GMO me kai kī ʻia i ka RoundUp. Hānai ʻia ka hope o nā hui i ka meaʻai GMO ʻole. ʻElua makahiki ka lōʻihi o kēia ʻimi naʻauao ʻana. 

I ka hopena o ka ʻimi ʻike, ʻokiʻoki ʻia nā kino o nā ʻiole apau. Ma nā hui ʻekolu mua he mau maʻi pili kino ko nā ʻiole. He puʻupuʻu koko ʻū ko nā ʻiole wahine a ʻōmaʻimaʻi ko lākou lolo. Pōʻino nā ake me ka hakuʻala o nā ʻiole kāne. ʻO kēia mau ʻiole, ʻemo ʻole a make lākou i ke ʻino o ka meaʻai. Ua wānana ka poʻe ʻepekema inā nui nā kemika ma ka meaʻai, e hele ana a maʻi nā ʻiole. ʻO ka mea hoʻopūʻiwa iā lākou i ka hoʻololi ʻana i ka ōewe o nā hua a ʻai ka ʻiole, hele a nāwaliwali ke kino o ka ʻiole. Koʻikoʻi kēia hana a Seralini no ka mea ʻike ʻia kēia mau maʻi ma nā kānaka. Like ka puʻupuʻu koko ʻū o nā ʻiole wahine me ka maʻi ʻaʻai ʻū o nā wahine. A kohu like nā ʻino pili i ke ake me ka hakuʻala o nā ʻiole me nā kāne. 

Aia ke kemika Glyphosate ma nā meaʻai a pau loa. Inā pēlā, he GMO nā meaʻai ʻokanika a pau loa. Inā hoihoi ka mea heluhelu e ʻike pono inā he Glyphosate ma kāu meaʻai, e hana penei. E mālama i nā hua a pau āu i ʻai ai. E hoʻopulu i kahi kāwele pepa i ka wai. E kaomi i ka hua ma waena konu o ke kāwele pepa. E pelu i ke kāwele pepa a pahū ka hua. E hoʻokomo i ke kāwele pepa i loko o kahi ʻeke ʻūlina a e pani. Malia paha i ka hala ʻana o ʻelua mau lā e loli ana ka hua, a e hele ana ke kāwele pepa a ʻalani; ʻo ia ke kemika Glyphosate. Inā makemake ʻoe i kino ikaika e ʻimi i nā kumu lāʻau kāhiko a i ʻole e hoʻoulu i kāu meaʻai ponoʻī.

© Kiʻi Pōhaku . 2018

Nā Kumu ʻIke:

© kauluhoi 2018