Ola ka lolo i ka nane ʻia
NA Haukea Hokoana

Ua ʻōlelo ʻia he ʻelua ʻāpana o kou lolo, ʻo ia ka ʻaoʻao hema a me ka ʻaoʻao ʻākau. He mau kuleana ko kēia mau ʻaoʻao pākahi o ka lolo, no laila inā hiki ke hoʻohana ʻia kēia mau ʻāpana ʻelua ma ka manawa like, e hoʻohana piha ʻia ka lolo holoʻokoʻa. No ka pāʻani nane (ka pāʻani nane hua ʻōlelo, ka pāʻani nane ʻāpana, ka pāʻani nane helu, a pēlā aku), hoʻohana ʻia nā ʻāpana ʻelua o kou lolo ke hana ʻoe i kēia mau nane (wahi a jigsawjungle.com). Wahi a Ann Lukits, he akeakamai, hiki i ka pāʻani nane ke hoʻoikaika i kou hoʻomanaʻo ʻana a me ka hana maʻa mau o ka lolo, a he mea maikaʻi nō ka hoʻohana piha ʻana i kou lolo holoʻokoʻa. Akā, e like me ka mea maʻa mau ma kēia ola, aia kekahi manaʻo ʻē aʻe. He mea maikaʻi ʻole ka hoʻohana piha ʻana i kou lolo holoʻokoʻa i ka manawa a pau no ka mea, he hana ia e hoʻoluhi ana i kou lolo. Eia ka hāʻina: Inā hana ʻoe i ka pāʻani nane me kou mau hoa a i ʻole ma ka hui, ʻoi aku ka maikaʻi no ka lolo. He hana kēia e hoʻoikaika ʻia ai ka mākau ʻōlelo, ka mākau launa, ka mākau hoʻolohe, a me ka manaʻo kākepakepa. 

Ma ka hui hoʻi, hoʻoikaika ʻia kēia mau mākau a pau. ʻO ka ʻoi nō naʻe ka hana pū, ke kūkaʻi manaʻo, a me ka loaʻa ʻana o kahi ʻaelike. He hana nui kēia ma ka hui, no ka mea, nui nā kānaka like ʻole a me nā manaʻo like ʻole. No laila, e pono ana ka hoʻolohe i nā manaʻo ʻē aʻe, a me ke kamaʻilio pono ʻana ma waena o nā kānaka a pau. He hana pū nō keia, a loaʻa ka hāʻina i ka hui holoʻokoʻa. ʻAʻole kēia he mākau no ke kula wale nō, akā he mākau ola kēia.

He waiwai nō kēia hana ʻana i nā nane a ke ao haole. Eia kaʻu, e ka mea heluhelu, pehea nā nane a ka poʻe Hawaiʻi?

© Haukea Hokoana . 2018

© kauluhoi 2018