Ke Kani o nā Manu Kūkahekahe
NA Nāihe Paʻaluhi

image4

Wahi a kūpuna, “ʻŌʻū ō loa nā manu o Kaupeʻa.” ʻO ia hoʻi, hiki ke ʻike ʻia ka hauʻoli o kānaka ke pā mai ka pepeiao i ke kani walaʻau. No kekahi o nā kuene mokulele o Hawaiian Airlines, e ʻike ʻia ana nō ka hauʻoli i ka ʻōlelo Hawaiʻi ʻana ma ka mokulele. Ua hoʻolālā ʻia mai ka hoʻolauleʻa ʻana i ke ola o ka ʻōlelo Hawaiʻi i ka hoʻohui ʻana mai o nā kuene ʻōlelo Hawaiʻi ma kekahi mau huakaʻi mokulele. Ma ia mau huakaʻi nō e hoʻopuka ʻia aʻe ai ka ʻōlelo Hawaiʻi wale nō ma nā kūkala mokulele a me ka walaʻau ʻana. ʻO Nā Manu Kūkahekahe ka inoa o kēia hui a ʻo kēia ka maka mua o nei ʻano papahana.  

ʻOiai ua lana ka manaʻo e mālama ʻia kēia papahana ma muli o ka hoʻōle ʻia ʻana o kā kākou ‘ōlelo Makuahine i nā mahina i hala aʻe nei, ʻo Pepeluali ka mahina o ka ʻōlelo Hawaiʻi a he wā kūpono nō kēia e hōʻoia ʻia ai ke ola o ka ʻōlelo ma ke ao pāʻoihana. ʻO ka pahuhopu o kēia hui kuene ʻōlelo Hawaiʻi, ʻo ia hoʻi ka hoʻākoakoa ʻana mai i nā kuene ʻōlelo Hawaiʻi i hiki ke ʻōlelo ma ka mokulele mai kahi pae a kahi pae o ka pae ʻāina a hiki hoʻi i ʻAmelika, mai ka haʻalele ʻana a i ka pae ʻana o ka mokulele. He mea nui ka hoʻopuka ʻana aʻe i kā kākou ʻōlelo ma nā wahi like ʻole no nā mea like ʻole, i mea e ola hou ai ʻo ia ma ke kaiāulu ākea.

No ka hoʻolālā ʻana mai i kēia papahana, noi ʻia maila nā kuene ʻōlelo Hawaiʻi e kōkua aku a ʻaʻole i liʻuliʻu a ō aku mākou. He 2,000 paha kuene mokulele ma Hawaiian Airlines; eia naʻe, he 12 a 13 ka nui o nā kuene ʻōlelo Hawaiʻi, ʻaʻole mākou i nui. Hoʻokumu ʻia kēia papahana e Hawaiian no ka unuhi ʻana i nā kūkala a pau mai ka ʻōlelo haole a i ka ʻōlelo Hawaiʻi i hiki ke hoʻopuka ʻia ma luna o ka mokulele. E mālama ʻia ana he ʻelua huakaʻi ma ka ʻōlelo Hawaiʻi wale nō me nā kuene ʻōlelo Hawaiʻi ma Malaki: ʻo Las Vegas kekahi o nā wahi i koho ʻia a ʻo ka lele ʻana ma ka pae ʻāina kekahi. Ua koho ʻia ʻo Las Vegas ma muli o ka nui hewahewa o ka poʻe kamaʻāina e lele ana i laila a ua koho ʻia ka lele ʻana ma ka pae ʻāina i mālama ʻia nō hoʻi ka papahana ma nā kai ʻewalu. 

No ka hoʻopuka ʻana i nā kūkala ma ka ipuleo o ka mokulele, pono ka hōʻoia mua ʻia ʻana ka hiki i ke kuene ke unuhi i nā kūkala a pau i koi ʻia e ka FAA. No ka ʻōlelo Hawaiʻi, na Leilani Basham, he kumu ʻōlelo ma ke Kula Nui o Hawaiʻi ma ʻEwa, e hōʻoia i ka hiki i nā kuene ke ʻōlelo Hawaiʻi. ʻO ke kumu o kēia hōʻoia ʻana i ka hiki ke ʻōlelo Hawaiʻi, ʻo ia hoʻi ke ʻano o ka hōʻoia ʻana i nā kuene unuhi ʻōlelo like ʻole ma Hawaiian Airlines. Nui ko Hawaiian mau wahi o ka lele ʻana a ʻo nā ʻāina ʻē like ʻole kekahi o kēlā mau wahi. He pono nā kānaka i hiki ke unuhi i nā ʻōlelo like ʻole e laʻa me ka ʻōlelo Kepanī, Kōlea, Pākē, Palani, a Haʻamoa. I nā kuene e hai ʻia ai, koi ʻia lākou e mālama i hōʻike a ma hope nō e kau ai ke kūlana kuene unuhi ma luna o lākou. Eia naʻe, pono ka poeko a mīkololohua o ka ʻōlelo, ʻaʻole ʻae ʻia ke kūlana unuhi inā maopopo wale nō iā ia nā pae haʻahaʻa o ka ʻōlelo. Ke hōʻoia ʻia maila ka hiki ke hoʻopuka wale aʻe i ka ʻōlelo, kau ka hae o kēlā ʻāina ma ke pihi inoa o kēlā kuene. Pēlā e ʻike ʻia ai ka hiki i ke kuene ke unuhi a hoʻopuka i kekahi ʻōlelo. No nā kuene ʻōlelo Hawaiʻi, e kau haʻaheo ana ka hae Hawaiʻi. He hōʻailona kēia no ke kū like ʻana o kā kākou ʻōlelo Makuahine me nā ʻōlelo ʻē aʻe ma Hawaiian Airlines a me ko lākou mālama ʻana i ka ʻōlelo o kēia ʻāina nei. 

E kuʻu makamaka heluhelu, inā hiki ke lohe ʻia mai ke kani o nā manu like ʻole o nā ʻāina ʻē, pehea ke kani hone a ka leo o nā manu ʻōiwi o nei one hānau i pūlama mau ʻia? Ma hea hou aʻe nō e lohe ʻia ai kā kākou ʻōlelo makuahine i kēia au hou e kolo aku nei? Ma ka hana, ma nā kula, ma nā halekūʻai, ma nā hale kiʻi ʻoniʻoni, a ma nā ala hele paha? Ma laila e ʻike ʻia ai ke ola maikaʻi o ka ʻōlelo, ke lohe ʻia kona kani nani ma nā wahi like ʻole.

© Nāihe Paʻaluhi . 2018

© kauluhoi 2018